Տավուշի մարզպետի աշխատակազմ

Այցի հիմնական նպատակն էր Տավուշի մարզում պրոֆեսիոնալ ագրոտուրիզմի ռազմավարության ներդրումը։ Սա 2025 թվականի հունիսին Երևանում ստորագրված գործընկերության 4-րդ համաձայնագրի գործնական շարունակությունն է, որն իրականացվում է Ֆրանսիայի «Հայաստան» համահայկական հիմնադրամի անմիջական աջակցությամբ։

Այցի հիմնական ձեռքբերումները.
Փորձի փոխանակում Դրոմում.
Պատվիրակությունն այցելել է Վալանս քաղաք և Դրոմ դեպարտամենտ, որն իր բնակլիմայական պայմաններով և պտղաբուծությամբ շատ նման է Տավուշին։ Ուսումնասիրվել են 2016-ից գործող ագրոտուրիստական հաջողված մոդելները։

Գործնական կապեր.
Պատվիրակության կազմում ընդգրկված տավուշցի ֆերմերները (մեղվաբույծ և հյուրատան սեփականատեր) հնարավորություն ունեցան անմիջականորեն ծանոթանալու ֆրանսիական տնտեսությունների փորձին։

Կրթական բաղադրիչ.
Ծրագրի շրջանակում արդեն իսկ իրականացվում են վերապատրաստումներ Տավուշի 12 ֆերմերային տնտեսությունների համար, ինչպես նաև հատուկ դասընթացներ՝ Իջևանի Պատրիկ Դևեջյանի անվան վարժարանի սաների համար։

Այցի ընթացքում պատվիրակությանը հյուրընկալել են Օ-դը-Սենի փոխնախագահ Մարի-Լոր Գոդենը, Ֆրանսիայի «Հայաստան» հիմնադրամի ներկայացուցիչ Միշել Փազումյանը, ինչպես նաև Վալանսի քաղաքային իշխանությունների ներկայացուցիչները։

Տավուշի մարզը շարունակում է հետևողականորեն ընդլայնել միջազգային համագործակցության շրջանակները՝ ի նպաստ մարզի կայուն զարգացման։