Տավուշի մարզպետի աշխատակազմ

Ապրիլի 13–14-ը Օ-դը-Սեն դեպարտամենտն իր հյուրընկալությամբ ընդունեց Տավուշի մարզից ժամանած պատվիրակությանը՝ միջազգային համագործակցության քաղաքականության շրջանակում։

Պատվիրակության կազմում էին Տավուշի մարզպետ Հայկ Ղալումյանը, մարզպետի տեղակալ Նարեկ Ղուշչյանը, ինչպես նաև ոլորտի պատասխանատու մասնագետներ։

Այցի ընթացքում կայացան բազմաթիվ հանդիպումներ, որոնք հնարավորություն ընձեռեցին ամրապնդել գործընկեր տարածքների միջև կապերը և քննարկել կոնկրետ ծրագրեր՝ կայուն ու նորարարական զբոսաշրջությունը խթանելու նպատակով։

Անցկացվեց եռակողմ ղեկավարող կոմիտեի նիստ՝ նվիրված Տավուշում ագրոպաստորալ զարգացման ծրագրին, որի շրջանակում ամփոփվեց նոր ճանապարհային քարտեզի իրականացման ընթացքը, մասնավորապես՝ ագրոտուրիզմի ոլորտում իրականացվող գործողությունները։ Ներկայացվեց դեպարտամենտի զբոսաշրջության և հանգստի ռազմավարությունը, ինչպես նաև կայացան կառուցողական քննարկումներ՝ ռազմավարական տեսլականները համադրելու և ապագա համագործակցության ուղղությունները բացահայտելու նպատակով։

Պատվիրակությունը հանդիպեց Օ-դը-Սեն դեպարտամենտի նախագահ Ժորժ Սիֆրեդիի հետ, ինչպես նաև դեպարտամենտի փոխնախագահ Մարի-Լոր Գոդենի հետ, ով պատասխանատու է միջազգային համագործակցության և եվրոպական հարցերի համար։ Բացի այդ, կայացան հանդիպումներ զբոսաշրջության ոլորտի մասնագետների հետ, այդ թվում՝ Իսի-լե-Մուլինոյի զբոսաշրջության գրասենյակի՝ «Issy Tourisme International» թիմի հետ։

Պատվիրակությունն այցելեց Պյուտո քաղաքում գտնվող «O'Gourmandises d'Ange» արհեստանոց, որն իր «Տուրիզմի արհեստավոր» պիտակավորմամբ ներկայացնում է տեղական ավանդական հմտությունները:

Պատվիրակության անդամները հարգանքի տուրք մատուցեցին Հայոց ցեղասպանության զոհերի հիշատակին՝ այցելելով Օ-դը-Սենում գտնվող հուշահամալիր։

Երկօրյա այցն ամբողջությամբ նվիրված էր տարածաշրջանի զբոսաշրջային գրավչության բարձրացման մեխանիզմների ուսումնասիրությանը, փորձագիտական փոխանակմանը և ապագա համատեղ նախաձեռնությունների հիմքի ձևավորմանը։