Տեղեկատվական կենտրոն
Նորություններ
Հյուրատնային նոր հասցե Գոշ գյուղում:
18.09.2023
Այսօր՝ սեպտեմբերի 18-ին, Գոշ գյուղում բացվեց «Հոթել Արևի Գոշ» հյուրատունը:
Բացման արարողությանը ներկա էին Շվեյցարիայի զարգացման և համագործակցության գործակալություն
Տարածաշրջանային տնօրենի տեղակալ Վերներ Թութը, Տուրիզմի հայկական ֆեդերացիայի նախագահ Մեխակ Ապրեսյանը, Տավուշի մարզպետի աշխատակազմի աշխատակիցներ, այլ հյուրեր:
Հյուրատան շինարարությունը սկսվել է 2022թ. հոկտեմբերին: Այժմ՝ գրեթե մեկ տարի անց, հյուրատունն արդեն ընդունում է Գոշ այցելած զբոսաշրջիկներին:
«Հյուրընկալության ծառայություն ունենալու գաղափարը վաղուց է եղել, քանի որ Գոշ գյուղի հիմնական այցելուները գալիս էին գյուղ, ապա գիշերակացի համար վերադառնում Դիլիջան կամ Երեւան: Վերջին տարիներին զարգանում է զբոսաշրջիկներին մատուցվող ծառայությունները, սակայն գիշերակացի ծառայությունը թույլ էր: Վստահ եմ, սա լավ օրինակ կլինի նաեւ մեր հարեւանների համար, որ իրենց տներում եւս մատուցեն նման ծառայություն: Մենք պատրաստ ենք մեր ռեսուրսներով օգնել նրանց»,- իր խոսքում նշեց «Հոթել Արևի Գոշ»-ի հիմնադիր Գեւորգ Գասպարյանը:
«Հոթել Արևի Գոշ» հյուրանոցը հիմնվել է «Ռազմավարական զարգացման գործակալություն» ՀԿ-ի կողմից իրականացվող «Հայաստանի կենդանի լանդշաֆտները շուկայի զարգացման համար» ծրագրի աջակցությամբ:
Նշենք, որ «Հայաստանի կենդանի լանդշաֆտները շուկայի զարգացման համար» ծրագրի նպատակն է բարելավել հեռավոր շրջաններում ֆերմերների, գյուղական բիզնեսների եկամուտները և գյուղական բնակչության բնական ապրուստի միջոցները՝ տեղական բնական ռեսուրսների տնտեսապես ավելի արդյունավետ և ավելի կայուն օգտագործման և կառավարման շնորհիվ։
Հայաստանում ծրագիրն իրականացվում է Շվեյցարիայի զարգացման և համագործակցության գործակալության աջակցությամբ, Բնության համաշխարհային հիմնադրամի հայաստանյան մասնաճյուղի կողմից (WWF-Հայաստան)՝ «Ռազմավարական Զարգացման Գործակալություն» (ՌԶԳ) ՀԿ-ի հետ համատեղ:
Հետևեք մեզ նաև Telegram-ում