Տեղեկատվական կենտրոն
Նորություններ
Քննարկվել է Բերդ համայնքի աղետների ռիսկի կառավարման պլանը
27.06.2023
![](http://tavush.mtad.am/files/n_pics/35540_s.jpg)
«Աղետների ռիսկի նվազեցման ազգային պլատֆորմ»(ԱՌՆԱՊ) հիմնադրամի նախաձեռնությամբ, «Վորլդ Վիժն Հայաստան» կազմակերպության հետ համագործակցությամբ, այսօր՝ հունիսի 27-ին, մեկնարկել է «Համայնքի աղետների ռիսկի կառավարման պլանի և տեղահանված/տարհանված բնակչությանն ընդունելու կարգի ներկայացում» թեմայով երկօրյա դասընթաց-քննարկումը:
Դասընթաց-քննարկմանը մասնակցել են ՀՀ Տավուշի մարզպետի աշխատակազմի զարգացման ծրագրերի մշակման և իրականացման բաժնի պետ Գուրգեն Հարությունյանը, Բերդ համայնքի ղեկավարի տեղակալ Մհեր Պապյանը, ուժային կառույցների ղեկավարներ եւ մի շարք պաշտոնատար անձինք:
Ավելի վաղ ԱՌՆԱՊ հիմնադրամի փորձագետը Բերդի համայնքապետարանի աշխատակիցների աջակցությամբ հավաքագրել է աղետների ռիսկի կառավարման պլանի մշակման համար անհրաժեշտ տեղեկատվությունը, բնակավայրեր կատարած այցերի շրջանակում քարտեզագրել համայնքին սպառնացող վտանգները, դրանց նկատմամբ խոցելիությունը և կարողությունները: Նշված աշխատանքների հիման վրա էլ կազմվել է համայնքի աղետների ռիսկի կառավարման պլանը:
Դասընթաց-քննարկման նպատակն է ներկայացնել համայնքի աղետների ռիսկի կառավարման պլանը, բարելավել համայնքապետարանի և համապատասխան այլ կառույցների աշխատակիցների՝ վերը նշված պլանով առաջնորդվելու հմտությունները, արտակարգ իրավիճակների դեպքում օպերատիվ, համակարգված արձագանքելու և գործելու կարողությունները, ինչպես նաև քննարկման ընթացքում լսել ներկաների կարծիքներն ու դիտարկումները և անհրաժեշտության դեպքում համապատասխան լրացումներ ու մշակումներ կատարել:
Միջոցառումն իրականացվում է «Հասանելի համայնքային սոցիալական ծառայություններ» ծրագրի շրջանակում, որը ֆինանսավորվում է ԱՄՆ միջազգային զարգացման գործակալության(USAID) կողմից: