Տավուշի մարզպետի աշխատակազմ

  Փետրվարի 7-ին կայացավ Տավուշի մարզի խորհրդի 2023 թվականի առաջին նիստը, որը վարեց մարզպետ Հայկ Ղալումյանը։ Մինչ օրակարգի հարցերին անցնելը մարզպետը ծննդյան օրվա առթիվ շնորհավորեց Բերդ համայնքի ղեկավար Աստղիկ Հակոբյանին։ 

  Օրակարգի առաջին հարցով մարզպետարանի զարգացման ծրագրերի, զբոսաշրջության և վերլուծության բաժնի վարիչ Գուրգեն Հարությունյանը զեկուցեց 2022 թվականին իրականացված և 2023 թվականի համար հաստատված սուբվենցիոն ծրագրերի մասին։ Նշվեց, որ 2022 թվականին մարզի համայնքներից մարզպետարան է ներկայացվել 21 սուբվենցիոն հայտ՝ 4,7 մլրդ․ դրամ նախնական արժեքով։ 2023թ․ միջգերատեսչական հանձնաժողովին է ներկայացվել 28 սուբվենցիոն ծրագիր՝ 7,27 մլրդ․ դրամ ընդհանուր արժեքով։ Համայնքների ղեկավարներին առաջարկվեց հետևողական լինել սուբվենցիոն ծրագրերով իրականացվող աշխատանքների որակի հարցում։

 Օրակարգի հաջորդ հարցով մարզպետարանի ֆինանսական և սոցիալ-տնտեսական զարգացման վարչության պետ Ասքանազ Բաբլումյանը անդրադարձավ 2023 թվականի բյուջեների սեփական եկամուտների ձևավորման գործընթացին, ներկայացրեց 2023 թվականի տեղական բյուջեների սեփական եկամուտների համեմատականը 2022 թվականի համեմատ։ Աճի ցածր տոկոս ունեցած համայնքների ղեկավարներին առաջարկվեց վերանայել սեփական եկամուտների ձևավորման աղբյուրները տեղական բյուջեներում և ապահովել համապատասխան աճ։ Անդրադարձ եղավ նաև պետական հողերի վարձակալության գործընթացին։ Համայնքների ղեկավարներին առաջարկվեց ավելի հետևողական լինել պայմանագրերի կնքման և վարձավճարների հավաքագրման գործընթացում։

  Իր զեկույցում գյուղատնտեսության ոլորտի աշխատանքներին անդրադարձավ մարզպետարանի գյուղատնտեսության և բնապահպանության վարչության պետ Վաղարշակ Սուքոյանը։ Նախ անդրադարձ եղավ 2022 թվականի աշնանացանի աշխատանքներին։ Նշվեց, որ պետական աջակցության ծրագիրը նպաստել է աշնանացանի ցանքատարածքների ավելացմանը շուրջ 1200 հեկտարով։ 2021 թվականին իրականացվել է 2400 հա աշնանացան, 2022-ին՝ 3556, որից պետական աջակցության ծրագրի շրջանակներում՝ 2824 հա։ Համայնքների ղեկավարներին առաջարկվեց սահմանված կարգով տեղերում իրականացնել մոնիթորինգ՝ ծրագրի շրջանակներում գյուղացիներին գումար տրամադրելու նպատակով։ Անդրադարձ եղավ նաև պետական օժանդակության ծրագրերով 2022 թվականին մարզում կատարված աշխատանքներին։

   Օրակարգի հաջորդ հարցով 2022 թվականի ձմեռային զորակոչի արդյունքների և 2023 թվականի գարնան վարժական հավաքների նախապատրաստական աշխատանքների մասին զեկուցեց մարզպետարանի զորահավաքային նախապատրաստության բաժնի վարիչ Գագիկ Մատինյանը։ Վարժական հավաքները պատշաճ մակարդակով անցկացնելու նպատակով համայնքների ղեկավարներին առաջարկվեց առաջնորդվել բացառապես «Պաշտպանության մասին» ՀՀ օրենքի պահանջներով: Սահմանված կարգով, 3 ամիսը մեկ, համապատասխան զորակոչային և զորահավաքային համալրման ծառայության տարածքային ստորաբաժանումների և տարածքում տեղակայված զորամասերի հետ ճշտել կցագրման ռեսուրսները: Զինապարտի բացակայության դեպքում անհապաղ տեղեկացնել զորակոչային և զորահավաքային համալրման ծառայության տարածքային ստորաբաժանումներին:

  Նիստին քննարկվեցին այլ ընթացիկ հարցեր ևս։ Նիստի աշխատանքներն ամփոփեց մարզպետ Հայկ Ղալումյանը։