Տավուշի մարզպետի աշխատակազմ

  Տավուշի մարզպետարանում հրավիրված խորհրդակցությանը քննարկվել են նոր կորոնավիրուսի վարակի /COVID-2019/՝ մարզի տարածք ներթափանցման կանխարգելման, բնակչության առողջության պահպանման, առողջապահական հաստատություննների աշխատանքի արդյունավետ կազմակերպման, հակահամաճարակային միջոցառումների իրականացմանն անհրաժեշտ մասնակցություն ցուցաբերելու, բնագավառում մշտադիտարկում իրականացնելու և բնակչության շրջանում իրազեկվածության բարձրացման հարցեր։ Քննարկմանը մասնակցել են մարզի բուժհաստատությունների տնօրենները, համաճարակաբանները, ՀՀ ԱՆ ՀՎԿԱԿ «Տավուշ» մասնաճյուղի տնօրենը, ՀՀ ԱԻՆ ՓԾ Տավուշի մարզային փրկարարական վարչության պետը, այլ պատասխանատու անձինք։ Խորհրդակցությունը վարել է մարզպետի տեղակալ Թաթուլ Ստեփանյանը։ Տեղեկացվել է, որ Տավուշի մարզպետի համապատասխան որոշմամբ ստեղծվել է հանձնաժողով մարզպետի տեղակալի գլխավորությամբ և որ հանձնաժողովն ունի համապատասխան աշխատանքային գրաֆիկ և իր իրազեկման ու մասնագիտական խմբերով պետք է իրականացնի անհրաժեշտ միջոցառումները։ Միջոցառումների ցանկում կարևորվել է բժշկական կազմակերպությունների ապահովումը անհրաժեշտ հագեցվածությամբ, մեկուսարաններով, ախտահանիչ նյութերով, ինչպես նաև բժշկական անձնակազմի ապահովումը անձնական պաշտպանիչ միջոցներով, ստացիոնարներում տեսակցությունների սահմանափակումը։