Տեղեկատվական կենտրոն
Նորություններ
Դիլիջանում կայացել է «Էկոթոն Տավուշ. Տավուշի մարզի առջև ծառացած կլիմայական հիմնախնդիրները և դրանց հնարավոր լուծումները» խորագիրը կրող միջոցառում
13.11.2019
Նոյեմբերի 8-ին Դիլիջանի միջազգային դպրոցում տեղի է ունեցել «Էկոթոն Տավուշ. Տավուշի մարզի առջև ծառացած կլիմայական հիմնախնդիրները և դրանց հնարավոր լուծումները» խորագիրը կրող միջոցառումը, որը կազմակերպվել էր «Կանայք կլիմայում և էներգետիկայում» ՀԿ-ի և «Այրես զարգացման հիմնադրամի» կողմից` "EcoQuest" ծրագրի շրջանակներում, Գերմանիայի միջազգային համագործակցության ընկերության (GIZ) աջակցությամբ, ՄԱԿ-ի Զարգացման ծրագրի կլիմայի փոփոխության ծրագրի և Դիլիջանի միջազգային դպրոցի գործընկերությամբ և աջակցությամբ:
Նպատակն էր համախմբել շահագրգիռ կողմերին, հանրությանը, համայնքի անդամներին՝ համատեղ սահմանել Տավուշի մարզի առջև ծառացած կլիմայական մարտահրավերները և մշակել լուծումներ, որոնք կարող են դրական ազդեցություն ունենալ համայնքի վրա:
Միջոցառմանը մասնակցել են Տավուշի մարզպետի խորհրդական Նիկոլայ Գրիգորյանը, «Կանայք կլիմայում և էներգետիկայում» ՀԿ-ի հիմնադիր նախագահ Նունե Սաքանյանը, Դիլիջանի միջազգային դպրոցի կայունության համակարգող Գաուտամ Բաներջին և մի շարք հյուրեր, ովքեր հանդես են եկել ողջույնի խոսքերով և զեկույցներով։
Միջոցառման ընթացքում ներկա ավելի քան 5 տասնյակ երիտասարդ բնապահպանները՝ բաժանվելով տարբեր խմբերի, սահմաված ժամանակահատվածում մշակել և ներկայացրել են առկա խնդիրների լուծման իրենց տարբերակները, իսկ ժյուրին լավագույն լուծում առաջարկելու համար ընտրել է լավագույն խմբերին։ Որպես մրցանակ` վերջիններիս հանձնել են Գերմանիայի միջազգային համագործակցության ընկերության կողմից պատրաստված պարգևատրման վկայականները` 250 հազար ՀՀ դրամին համարժեք ծրագրին աջակցող նյութեր տրամադրելու համար:
Հաղթող խմբերն էին`
- ԿԱԹԻԼ2
- Մովսես
- ԷԿՈմշակույթ
- Բարդի
Բոլոր ներկաները ստացել են մասնակցության վկայաններ և ՄԱԿ-ի Զարգացման ծրագրի կլիմայի փոփոխության ծրագրի կողմից տրամադրված նվերներով լի էկո տոպրակներ: