Տավուշի մարզպետի աշխատակազմ

Ազատամուտ համայնքի մշակույթի պալատում տեղի ունեցավ «Ազատամուտյան հերոսապատում» հիշատակի եւ ոգեկոչման շարքի վերջին միջոցառումը՝ նվիրված արցախյան ազատամարտի հերոս Լեռնիկ Աղբալյանին:
Ծնվել է 1974թ. նոյեմբերի 6-ին Տավուշի մարզի Աչաջուր գյուղում, ապա տեղափոխվել Ազատամուտ։ Լեռնիկ Աղբալյանը եղել է տաղանդավոր երաժիշտ: Չունենալով երաշտական կրթություն, նվագել է տարբեր երաժշտական գործիքների վրա՝ շվի, կլարնետ, ակորդեոն, դաշնամուր:
Դեռ զորահավաքին ներկայանալու իր ժամկետը չլրացած, 18-ամյա Լեռնիկը զինվորագրվում է հայոց սահմանների պաշտպանությանը: Ծառայելով Կապանի սահմանապահ զորամասում, նա կամավորագրվել է Հորադիզի պաշտպանությանը:

Ծանր մարտերից մեկի ժամանակ նա ոտքից վիրավորում է ստանում և շրջափակումից փրկվում Հադրութի ջոկատի օգնությամբ։ Հոսպիտալում դեռևս բավարար բուժում չստանալով՝ Լեռնիկը կրկին մեկնում է ռազմաճակատ։ Օմարի բարձունքում տեղի ունեցած դաժան մարտերից մեկում, 1994թ. փետրվարի 19-ին, անհավասար մարտում 20 տեղից վիրավորում ստանալով, Լեռնիկ Աղբալյանն իր անունը գրում է ազատամարտի պատմության փառքի էջերում:

Լեռնիկ Աղբալյանը հետմահու պարգեւատրվել է Արիության մեդալով:

Նրա արյունոտ ծոցատետրում ծնողները գտնում են այս բանաստեղծությունը.

Ազգի պատիվը բարձր պահելով,
Եռագույն դրոշը երկինք պարզելով,
Թուրքին կհաղթենք հայկական ոգով,
Արև կբերենք զուռնա-դհոլով։
Իսկ եթե այրվեմ, վառվեմ կրակով,
Սիրտս քուն մտնի թուրքի գնդակով,
Իմացե՛ք, տղե՛րք, հպարտ քայլերով
Ինձ հողին հանձնեք զուռնա-դհոլով։
Ու թե հեռանամ ես իմ հավատով,
Երբ հոգիս թռչի անավարտ երգով,
Տղե՛րք ջան, տղեր՛ք, հայկական երգով
Վրեժս առե՛ք զուռնա-դհոլով…

Լեռնիկ Աղբալյանի հիշատակին նվիրված միջոցառմանը ելույթ ունենալով, հերոսի հայրը՝ Հրանտ Աղբալյանը կարեւորեց երիտասարդ սերնդին արցախյան ազատամարտի էջերին ծանոթացնելու առաքելությունը, որ իրականացնում է «Ազատամուտյան հերոսապատում» շարքի հեղինակ եւ սցենարիստ, ուսուցիչ Վլադ Բալասյանը:

«Նոր բանակ գնացողներն ավագ եղբայրներին պետք է ճանաչեն։ Մեր զինվորների արյամբ բերված խաղաղությունն այնքան երկար թող լինի, որ բոլորը գնան, խաղաղությամբ ծառայեն ու գան, իսկ եթե որևիցե վտանգ սպառնա, ավագ եղբայրների վերժը լուծեն ու անփորձանք գան»,-նշեց հերոսի հայրը։

Միջոցառմանը մասնակցելու նպատակով Ազատամուտ էին այցելել Լեռնիկի մարտական ընկերները՝ Հայաստանի տարբեր մարզերից:

«Ազատամուտյան հերոսապատում» շարքի հեղինակ Վլադ Բալասյանը ոգեկոչման միջոցառումներ է կազմակերպել համայնքի մյուս հերոսների վերաբերյալ նույնպես: Սամսոն Ափինյանի, Արմեն Հակոբյանի, Ռոբերտ Գեւորգյանի, Աշոտ Անտոնյանի, Կարեն Թիրաբյանի եւ Լեռնիկ Աղբալյանի անուններով փողոցներ են անվանակոչվել Ազատամուտում: