Տավուշի մարզպետի աշխատակազմ

 Այսօր Տավուշի մարզպետարանի ուսումնական կենտրոնում տեղի ունեցավ աշխատանքային հանդիպում «Փախստականների պաշտպանություն և տնտեսական ինտեգրում» ծրագրի շրջանակներում։ Մասնակցում էին ՏԻՄ-երի, ԶՏԿ-ների, ՍԱՏԳ-ների, հասարակական կազմակերպությունների պատասխանատուներ ու ներկայացուցիչներ։ Հանդիպման ընդհանուր նկարագիրը ներկայացրեց Հայկական կարմիր խաչի ընկերության՝ բնակչության տեղաշարժի բաժնի աշխատակից Կարեն Խաչատրյանը։ Այնուհետև ՄԱԿ-ի փախստականների գրասենյակի արտաքին կապերի համակարգող Անահիտ Հայրապետյանը անդրադարձավ փախստականների պաշտպանության միջազգային և ազգային չափորոշիչներին, ընթացիկ ծրագրերին ու տարածաշրջանում փախստականների հիմնախնդիրներին։ ՀՀ ՏԿԶՆ միգրացիոն ծառայության ինտեգրման բաժնի աշխատակից Անի Դավթյանը ներկայացրեց փախստականների և ապաստանի մասին ՀՀ օրենսդրությունը, փախստականի կարգավիճակի ընթացակարգը, խոսեց փախստականների հիմնական իրավունքների ու պարտականությունների, ինչպես նաև ՄԾ-ի կողմից տրամադրվող աջակցության մասին։ Ներկայացված թեմաների շուրջ ցուցադրվեցին տեսանյութեր, որից հետո ծավալվեց քննարկում։ Հանդիպման մասնակիցներն անդրադարձան տարածաշրջանում փախստականների խնդիրներին ու ձեռքբերումներին, մարտահրավերներին, ծառայությունների հասանելիության ու համագործակցության հարցերին, հանդես եկան առաջարկություններով։