Տեղեկատվական կենտրոն
Նորություններ
ՀՀ Տավուշի մարզպետ Հայկ Չոբանյանի շնորհավորական ուղերձը Գիտելիքի օրվա կապակցությամբ
01.09.2019
![](http://tavush.mtad.am/files/n_pics/21881_s.jpg)
Սիրելի դպրոցականներ, կրթության նվիրյալ ուսուցիչներ, ծնողներ, սրտի թրթիռով դպրոց ոտք դրած առաջին դասարանցիներ, քոլեջների ու բուհերի ուսանողներ, դասախոսներ
Շնորհավորում եմ Գիտելիքի օրվա կապակցությամբ:
Տավուշցու համար կրթությունն ամեն ինչից վեր արժեք է: Այդպես է եղել միշտ, այդպես էր` երբ մեր գյուղերը գնդակոծվում էին: Կրթության եւ գիտելիքի ձգտումը մեզ համար կենսական պահանջ է լինելու բոլոր ժամանակներում:
Ժամանակակից աշխարհում մրցունակ կրթությունն է հրաշքներ գործում, պետությանը մղում առաջնային դիրքեր, ստեղծում արդյունք ու արժեք: Տավուշում արդեն մեկնարկել են ծրագրեր, արվել են քայլեր` ուղղված կրթության մրցունակության բարձրացմանը: Հանրակրթական դպրոցների զարգացմանը զուգահեռ, մենք հաստատուն քայլերով իրականացնում ենք նաեւ հեղինակային եւ առաջնորդության դպրոցների ներդրումը Տավուշում: Շուտով մեր դպրոցներն անճանաչելիորեն փոխվելու են: Փոխվելու է արդյունքն ու մեր ստեղծած արժեքի չափման միավորը:
Մենք նաեւ ունենք խնդիրներ: Դիմակայուն եւ հզոր Տավուշ ունենալու համար առաջին հերթին պետք է ազդենք ժողովրդագրական պատկերի վրա:
Տավուշի չորս դպրոցներում այս տարի առաջին դասարանցիների մուտք չի եղել: Մարզի 76 դպրոցներից 26-ում սովորում է 50-ից էլ պակաս աշակերտ: Գտնելու ենք լուծումներ` այս պատկերը կտրուկ փոխելու համար:
Բայց տարեցտարի մեր երեխաները նոր երազանքներ են բերում, ավելի նոր պատկերացումներ' ապագայի մասին, քան նախորդ սերունդներինն է: Սիրելի ուսուցիչներ, մեր խնդիրն է ոչ թե այս երեխաների երազանքները համապատասխանեցնել մեր պատկերացումներին, այլ խթանել նրանց երազանքներն ու գաղափարները, միաժամանակ անխախտելիորեն փոխանցելով ավանդաբար մեզ հասած արժեքները, ազգային հիմքի վրա կառուցելով ավելի նորարարական ու ստեղծարար պետություն:
Բոլորիդ մաղթում եմ բովանդակալից ուսումնական տարի` հագեցած նվաճումներով ու ստեղծագործ մտքի հաղթանակներով:
Սիրով Ձեր` Հայկ Չոբանյան