Տավուշի մարզպետի աշխատակազմ

 Խնամատարության ինստիտուտի զարգացման ու ներառական կրթության որակի բարելավման հարցերն են այսօր քննարկել Տավուշի մարզպետ Հայկ Չոբանյանը և ,,Հույսի կամուրջ,, հասարակական կազմակերպության նախագահ Սուսաննա Թադևոսյանը: Քննարկվող հարցերի համատեքստում մարզպետը կարևորել է իրազեկման խնդիրը, նշել, որ խնդիրները լուծելիս առաջին հերթին պետք է ելնել երեխայի շահեկանության տեսանկյունից և ստեղծել դրա մշակույթը: Հաջորդը նշվել է ծառայությունների համակարգի ձևավորման և երեխայի պաշտպանության ինստիտուտի ստեղծման խնդիրը: Կարևորելով հանրային ակտիվությունն ու մասնակցությունը խնդիրների լուծման գործում, մարզպետն առաջարկել է շահագրգիռ կողմերի կոնսոլիդացմամբ ստեղծել մի հարթակ, որտեղ կքննարկվեն բոլոր հարցերն ու կոնսոլիդացված որոշումներ կկայացվեն, որն ավելի արդյունավետ կլինի նոր մարտահրավերների պայմաններում: ,,Փորձենք առավելագույնս նախաձեռնող լինել,, ,- ասել է Հայկ Չոբանյանը: Քննարկման ընթացքում որոշվել է առաջիկա շաբաթվա մեջ կազմակերպել հանդիպում, որին կմասնակցեն սոցիալական ոլորտում հիմնական գործունեություն ծավալող կազմակերպությունների ղեկավարները, և օրակարգում կլինեն համագործակցության, երեխայի պաշտպանության համակարգի, կրթության, տեղեկատվության փոխանակման հարցերը: