Տավուշի մարզպետի աշխատակազմ

  Այսօր Տավուշի մարզի գործարարների հետ ունեցած հանդիպմանը մարզպետ Հայկ Չոբանյանը նշել է, որ մարզի համար առաջնահերթ խնդիրը տնտեսական զարգացումն է, իսկ դրա համար մեկ գործիչը ձեռներեցն է, և որպես Տավուշի մարզի բիզնեսի աջակից, ցանկացած խնդիր, որ կունենա մարզում որևէ ձեռնարկություն, ուղղակիորեն համարելու է իր առաջնահերթ խնդիրն ու անմիջապես լծվելու է այդ առաջնահերթ խնդիրների լուծմանը, կարևորել է ոչ միայն խնդրի լուծումը, այլև որոշակի կոմպետենցիայի ձևավորումը, այսինքն խնդրի դիտարկումը որպես երևույթի կամ օրինաչափության, որպեսզի այլևս նմանանտիպ խնդիրներ չառաջանան: Կարևորվել են նաև բիզնեսի խթանմանն ու զարգացմանն ուղղված նախաձեռնությունները բոլոր հնարավոր գործիքների ներգրավմամբ: <<Մեր բոլորիս գործողությունները պետք է ուղղված լինեն գործարարին օգնելուն և արժեք ստեղծելուն>>,-ասել է մարզպետը: Ներդրումային ծրագրերի իրականացման գործում ընդգծվել է տեղական գործընկերոջ դերը. <<Ցանկացած ներդրումային ծրագրի հիմնական կողմը դա տեղական գործընկերն է: Չի կարող որևէ ներդրումային ծրագիր հաստատվել, հետագայում հաջողություն ունենալ, եթե չկա տեղական գործընկեր, որովհետև տեղական գործընկերը կարող է ապահովել ներդրումային ծրագրերի հաջողությունն ու կայունությունը>>: Մարզպետը կարևոր է համարել նաև սոցիալական պատասխանատվության ծրագրերի իրականացումը, նշելով, որ այն պետք ձևավորել որպես մշակույթ: Որպես առաջնահերթություններ նշվել են սահմանմերձ և փոքր գյուղերը: Տեղեկացվել է, որ խնդիրների համակարգային լուծման նպատակով երկուշաբթի օրվանից գործելու է մարզպետին կից հարթակ, որտեղ կարող են գրանցվել մարզի գործարարները և ակտիվ մասնակցություն ունենալ հարթակի աշխատանքներին: Հարթակում նրանք կարող են քննարկել ոչ միայն իրենց խնդիրները, այլև դրանց լուծման տարբերակները, ծանոթանալ նոր ծրագրերին ու առաջարկություններին, զբաղվել ոլորտային զարգացումներով: Հանդիպման ավարտին մարզպետը պատասխանել է նաև գործարարներին հետաքրքրող հարցերին, տվել պարզաբանումներ: