Տավուշի մարզպետի աշխատակազմ

Աշխատանքային  առաջին  օրը Տավուշի մարզպետ Հայկ Չոբանյանը  այց կատարեց Հաղարծին վանական համալիր, որտեղ նրան ընդունեց Տավուշի թեմի առաջնորդ,  գերաշնորհ Տեր Բագրատ եպիսկոպոս Գալստանյանը: Հանդիպմանը ներկա էին նաև  հոգևոր դասի,  համայնքների, հասարակական կազմակերպությունների, արվեստի և կրթական հաստատությունների, ԶԼՄ-ների  ներկայացուցիչներ:  Բագրատ սրբազանը, ողջունելով, իր գոհունակությունը հայտնեց Հայկ Չոբանյանին Տավուշի մարզպետի պաշտոնում նշանակվելու   կապակցությամբ: Ճանաչելով նրան՝ համոզմունք հայտնեց, որ անպայման հաջողելու է իր գործում:  Սրբազանը և օրը, և վայրը խորհրդանշական համարեց.

-Հաղարծնի պատմական սուրբ վանքը միայն անցյալի հիշատակ չէ, այլ անցյալի ոտնահետքերն են, ներկայությունը, մեր պետականության խորրհրդանիշերը կրողն է, որ փոխանցվել է մեզ որպես պատասխանատվություն այսօրվա ապրողներիս, ովքեր նաև  կոչված են կերտելու ապագան: Մեր հայրերը դարերով են երազել այօրվա մասին: Դուք լիուլի ուխտ եք կնքում, հանձնառություն եք ստանձնում՝  մարմնավորումը լինելու այն բոլոր երազների, որոնք դարերով ծրարած հասել են մեզ,- ասաց Բագրատ եպիսկոպոսը:

Սրբազանը նաև իր ու հոգևոր դասի  անունից  պատրաստակամություն  հայտնեց աջակցել և համագործակցել բոլոր նախաձեռնություններում: Բագրատ եպիսկոպոսը մարզպետ Հայկ Չոբանյանին փոխանցեց  խորհրդանշական նվեր՝ Տավշո խաչը, որը Հաղարծնի վանքի խաչքարի կրկնօրինակն է:

  -Մենք պետք է ամեն ինչ անենք, որպեսզի գտնենք մեր առավելագույն կարողությունների դրսևորման եղանակը: Ես համոզված եմ, որ մենք ունենք հերոսական տարածշրջան՝ ամենաաշխատասեր ու արարիչ  ժողովրդով: Ամեն ինչ պիտի անենք, որ բոլորս միասին՝ հոգևոր, աշխարհիկ, մշակութային, տնտեսական ոլորտի ներկայացուցիչներով, համախմբված աշխատենք հանուն   մեկ միասնական նպատակի,- ասաց մարզպետ Չոբանյանը: