Տեղեկատվական կենտրոն
Նորություններ
Շերամին էր նվիրված Իջևանի թիվ 1 հիմնական դպրոցում կազմակերպված միջոցառումը
12.12.2018
Հայ գուսան-երգահան, ժամանակակից գուսանական երգարվեստի սկզբնավորող Շերամին /Գրիգոր Կարապետի Թալյան/ էր նվիրված Իջևանի թիվ 1 հիմնական դպրոցում կազմակերպված հերթական միջոցառումը: Շերամի ստեղծագործությունները բարձր են գնահատել Արմեն Տիգրանյանը, Ալեքսանդր Սպենդիարյանը և այլ ճանաչված կոմպոզիտորներ: Իսկ Էդվարդ Միրզոյանի խոսքերով՝ Շերամը ոչ թե աշուղ էր, այլ կոմպոզիտոր, քանի որ հորինում էր նոր և գեղեցիկ մեղեդիներ: Թառից հորդած ծորուն նվագակցությամբ նա երգում էր իր երգերը բոլորովին նոր մեղեդիներով:
Իջևանի թիվ 1 դպրոցի երաժշտության ուսուցչուհի Նարինե Շահինյանի հաղորդմամբ միջոցառումը կազմակերպվել է կրթօջախում ավանդաբար անցկացվող երգչախմբային ստուգատեսների շրջանակում՝ նպատակ ունենալով երեխաներին ճանաչելի դարձնել ու սիրել հայ ազգային երգարվեստը: Միջոցառմանը ներկա էր Տավուշի մարզպետարանի կրթության, մշակույթի և սպորտի վարչության պետի պաշտոնակատար Մանե Ղազումյանը: Մասնակցում էին 4-7-րդ դասարանների աշակերտները, ովքեր մեծ սիրով ներկայացրին Շերամի երգերը, որոնք ուղեկցվում էին երեխաների պարային գեղեցիկ կատարումներով: Ելույթները մեջընդմիջվում էին Շերամի կյանքին ու ստեղծագործությանը վերաբերող պատմություններով: