Պաշտոնական էլ. փոստ
(միայն www.e-citizen.am համակարգով ծանուցումների համար)
Տեղեկատվական կենտրոն
Նորություններ
Մարզպետ Վահե Ղալումյանը մասնակցել է նորաստեղծ կենտրոնների բացման արարողությանը
10.10.2018
Այսօր Տավուշի մարզի Աչաջուր համայնքում տեղի է ունեցել նորաստեղծ երկու կենտրոնների՝ Գինեգործական փորձացուցադրական արտադրամասի և Գյուղատնտեսական սպասարկման կենտրոնի /ԳՍԿ/ բացման հանդիսավոր արարողություն, որին ներկա են եղել ՀՀ Տավուշի մարզպետ Վահե Ղալումյանը, ՀՀ տարածքային կառավարման և զարգացման նախարարի առաջին տեղակալ Վաչե Տերտերյանը, ՀՀ գյուղատնտեսության նախարարության ներկայացուցիչներ:
Գինեգործական փորձացուցադրական արտադրամասը հիմնվել է CARD հիմնադրամի կողմից՝ ԱՄՆ Միջազգային զարգացման գործակալության /USAID/ ֆինանսավորմամբ՝ Հայաստանի ՓՄՁ ԶԱԿ հիմնդրամի և նրա գործընկերների կողմից իրականացվող ,,Գործընկերություն՝ հանուն գյուղական համայնքների բարգավաճման,, ծրագրի շրջանակներում: Կենտրոնի հագեցվածությունն ապահովվել է USAID/ARDI ծրագրի կողմից, իսկ տեխնիկական աջակցությունն իրականացրել է Գերմանիայի միջազգային համագործակցության ընկերության /GAZ/ կողմից ֆինանսավորվող ,,Մասնավոր հատվածի զարգացում և մասնագիտական կրթություն և ուսուցում Հարավային Կովկասում,, ծրագիրը:
ԳՍԿ-ն հիմնվել է CARD հիմնադրամի և ԱՄՆ Միջազգային զարգացման գործակալության ֆինանսավորմամբ ,,Ֆուլեր տնաշինական կենտրոն,, ՀԿ-ի և ,,Հեյֆեր փրոջեքթ ինթերնեյշնլ,, հայաստանյան մասնաճյուղի կողմից իրականացվող ,,Գյուղի զարգացման արդի նախաձեռնություն,, ծրագրի կողմից:
Գինեգործական փորձացուցադրական արտադրամասի և Գյուղատնտեսական սպասարկման կենտրոնի բացման առթիվ շնորհավորել է Տավուշի մարզպետ Վահե Ղալումյանը, շնորհակալություն հայտնել նախաձեռնության հեղինակներին ու աջակիցներին՝ նշելով, որ երկու նախաձեռնություններն էլ կնպաստեն մարզում խաղողագործության, գինեգործության և տուրիզմի զարգացմանը:
Հավելենք, որ Տավուշի մարզում ֆիլոքսերադիմացկուն խաղողի տնկանյութի արտադրության նպատակով CARD հիմնադրամը հուշագիր է ստորագրել Ֆրանսիայի խաղողագործության և գինեգործության ինստիտուտի հետ: Գաղափարին ֆինանսական և մասնագիտական աջակցություն է ցույց տալիս ,,Պեռնո Ռիկար,, խմբի Երևանի կոնյակի գործարանը:
