Տավուշի մարզպետի աշխատակազմ

  Այսօր Տավուշի մարզպետարանում կայացավ ,,Իմ քայլը հանուն Տավուշի,, ներդրումային համաժողովը, որին մասնակցում էին ծագումով մարզից սերած արտերկրում ու Հայաստանում ապրող գործարարներ: Համաժողովին մասնակցում էր ՀՀ վարչապետ Նիկոլ Փաշինյանը: Համաժողովի մասնակիցներին ողջունեց Տավուշի մարզպետ Վահե Ղալումյանը: Ողջույնի իր խոսքում մարզպետը շնորհակալություն հայտնեց հրավիրվածներին, հատկապես դրսից ժամանածներին, նաև համոզմունք հայտնեց, որ հետագա համագործակցությունը կստացվի, քանի որ մարզում արդեն կան ներդրումների զարգացման հաջողված օրինակներ: Որպես օրինակ բերեց ,,Տավուշտեքստիլը,,, որը տարածաշրջանում ապահովում է 520 աշխատատեղ 150 հազար դրամ միջին աշխատավարձով, ինչպես նաև Իջևանի գինու և կոնյակի գործարանը, որն ապահովում է 200-ից ավելի աշխատատեղ: Մարզպետը ընդգծեց նաև այն փաստը, որ գուցե սահմանամերձ Տավուշում բիզնես դնելը ռիսկեր է պարունակում, սակայն այն բոլոր դեպքերում կայանում է: Վարչապետ Նիկոլ Փաշինյանը նշեց, որ սա նման առաջին մարզային համաժողովն է, և նպատակը հանրահռչակելն է այն զարգացման բանաձևը, որ մենք այսօր դնում ենք մեր գործողությունների հիմքում: Առանցքային դրույթն այն է, որ Հայաստանի Հանրապետությունում իրոք տնտեսական զարգացում կարելի է ունենալ այն պարագայում, եթե գործարար միջավայրը և կառավարությունը կարողնան իսկապես գործընկերային հարաբերություններ հաստատել: Հայաստանի ՓՄՁԶԱԿ-ի գործադիր տնօրեն Արշակ Գրիգորյանը իր ելույթում նշեց ներառական աճ ապահովող ներդրումների մասին, որոնք անմիջական ազդեցություն կունենան բնակչի կենսապայմանների վրա: Այնուհետև իրենց ծրագրերը ներկայացրին ,,Բերք,, ՍՊԸ-ի, ,,Էկոգրինի,, , կոմպոզիտային հիմքով շինանյութի արտադրության, նուշի այգու հիմնման և այլ ծրագրերի ներկայացուցիչները: Մարզպետարանի աշխատակազմի ծրագրերի, զբոսաշրջության և վերլուծությունների բաժնի պետ Գուրգեն Հարությունյանը ներկայացրեց որոշ պատրաստի գաղափարներ, որոնք հաջողությամբ կարող են կյանքի կոչվել ֆինանսական ներդրումների առկայության պայմաններում: Տեսահոլովակների միջոցով հաջողված պատմություններ ներկայացրին ,,Գարդենիա,, ՍՊԸ-ն, ,,Իջևանի գինու և կոնյակի գործարան,, ԲԲԸ-ն, ,,ՀիմնաՏավուշ,, հիմնադրամը, ,,Տավուշտեքստիլ,, ՍՊԸ-ն: ,,Տավուշտեքստիլի,, սեփականատեր և հիմնադիր Սուրեն Երիցյանը անդրադարձ կատարեց ձեռնարկության անցած ճանապարհին՝ միևնույն ժամանակ նշելով, որ տեքստիլ արտադրությունը Հայաստանում զարգացման մեծ հեռանկար ունի: Համաժողովի աշխատանքներն ամփոփեց վարչապետ Նիկոլ Փաշինյանը՝ արձանագրելով, որ միջոցառումը ստացվել է: Նշեց, որ շատ երկար տարիներ Հայաստանում, ցավոք սրտի, վարվել է աղքատության խրախուսման քաղաքականություն: Ընդգծեց, որ այդ քաղաքականությունը պետք է փոխարինվի աշխատանքի խրախուսման քաղաքականությամբ, որը կառավարության հիմնական գաղափարաբանությունն է, քանի որ ի վերջո միայն աշխատանքի միջոցով են լուծվում բոլոր հարցերը: Այլ ճանապարհ չկա: Եզրափակելով համաժողովը, Տավուշի մարզպետը նշեց, որ այս համաժողովի հիմնական նպատակը համագործակցության սկիզբը դնելն էր, նաև ասաց, որ այս պահից հանգիստ չի թողնելու գործարարներին և հայրական օջախի ծուխը ծխացող կրտսեր եղբոր իրավունքով մի քիչ էլ պահանջելու է: