Տավուշի մարզպետի աշխատակազմ

 Այսօր ՀՀ Տավուշի մարզպետ Վահե Ղալումյանը աշխատանքային խորհրդակցություն անցկացրեց նախ Իջևան քաղաքի ու տարածաշրջանի համայնքների ղեկավարների, այնուհետև Դիլիջան համայնքի ղեկավարի ու վարչական ներկայացուցիչների հետ: Խորհրդակցության առանցքային հարցը սեփական եկամուտների հավագրումն էր, որի վրա էլ մարզպետը հրավիրեց համայնքների ղեկավարների ուշադրությունը: Անդրադառնալով յոթ ամսվա կտրվածքով սեփական եկամուտների հավաքագրմանը` մարզպետը ներկայացրեց այն համայնքները, որոնք նշված ժամանակահատվածում հավաքագրման ցածր մակարդակ են ունեցել: Համայնքների ղեկավարները վստահեցրին, որ մինչև տարեվերջ կաշխատեն ապահովել հավաքագրման բարձր ցուցանիշ: Մարզպետը ներկաների ուշադրությունը հրավիրեց նաև գույքահարկի կատարողականների վրա: Անդրադառնալով սուբվենցիաների տրամադրման գործընթացին` մարզպետը տեղեկացրեց, որ նոյեմբեր ամսից կմեկնարկի հաջորդ տարվա սուբվենցիոն ծրագրերի հայտերի ընդունման գործընթացը և կարևոր է, որ համայնքներն իրենց բյուջետային պլանավորումներն իրականացնեն սուբվենցիոն ծրագրերի հաշվարկներով, ընդգծեց, որ սուբվենցիայի նպատակը համայնքների համաչափ զարգացումն է:
 Մարզպետն անդրադարձավ նաև մարզում առաջիկայում կայանալիք համաժողովին, որին հրավիրված են մասնակցելու ծագումով տավուշցի գործարարները: ,,Անհրաժեշտ է մարդկանց բարեգործությունից ներգրավել ներդրումային դաշտում, համայնքներում ստեղծել նոր աշխատատեղեր,,- ասաց մարզի ղեկավարը:
  Խորհրդակցության ընթացքում քննարկվեցին նաև համայնքներում մարզական միջոցառումների կազմակերպմանը, նոր ուսումնական տարվա մեկնարկին, ինչպես նաև համայնքապետարաններում իրականացվող գործավարության որակի բարձրացմանն առնչվող հարցեր: