Տավուշի մարզպետի աշխատակազմ

Շարունակելով այցերը մարզի համայնքներ, այսօր մարզպետ Վահե Ղալումյանը եղել է Խաշթառակ, Դիտավան, Լուսահովիտ, Ակնաղբյուր համայնքներում: Այցերի հիմնական նպատակն է տեղերում, մոտիկից ծանոթանալ առկա խնդիրներին, հանդիպել համայնքների բնակիչների, ՏԻՄ ներկայացուցիչների հետ, լսել գյուղացուն ամենաշատը հուզող հարցերը: Բոլոր համայնքներում մարզպետը ծանոթացել է տեղական բյուջեների հնարավորություններին, սեփական եկամուտների կատարման ընթացքին: Հիմնականում մարզի համայնքներն ունեն համայնքային ենթակառուցվածքների՝ ճանապարհների, ոռոգման և խմելու ջրի համակարգերի կառուցման ու զարգացման խնդիր: Բացի համայնքապետարաններում լինելուց, Դիտավանում մարզպետ Վահե Ղալումյանն այցելել է դպրոց, նորակառույց մարզադահլիճ, նախակրթարան, Խաշթառակում եղել է նաև բժշկական ամբուլատորիայում: Համայնքներում մարզպետը զրուցել է բնակիչների հետ, նրանց ներկայացրել ՀՀ կառավարության կողմից գյուղերի զարգացման նպատակով որդեգրած քաղաքականության սկզբունքները: