Տավուշի մարզպետի աշխատակազմ

 Այսօր Տավուշի մարզպետարանում հրավիրված աշխատանքային խորհրդակցությանը մասնակցում էին  ՀՀ բնապահպանության նախարարության անտառային կոմիտեի  նախագահ Միքայել Մանուկյանը,  ,,Հայանտառ,, ՊՈԱԿ-ի տնօրենի պաշտոնակատար Արտակ Չոբանյանը, մարզի դատախազը, ոստիկանության մարզային վարչության և բաժինների պետերը, տեսչությունների ու անտառտնտեսությունների պատասխանատուները: Խորհրդակցությունը բացեց ՀՀ Տավուշի մարզպետ Վահե Ղալումյանը: Քննարկման առանցքային թեման անտառային տարածքներից բնակչությանը ծառերի թափուկների տրամադրման հարցն էր: Անտառային կոմիտեի նախագահ Միքայել Մանուկյանը առաջարկեց միասին վերլուծել խնդիրները՝ այդ գործում կարևորելով աշխատանքը համայնքների ղեկավարների հետ, որպեսզի նրանք ճիշտ տեղեկանքներ ներկայացնեն և հաշվի առնեն առաջնահերթությունները: Կարևորվեց նաև թափուկների վերահսկման մեխանիզմը, որպեսզի դրանք ծառայեն մարզի բնակչությանը և ոչ թե վաճառքի հանվեն: Իսկ թափուկների տրամադրման համար առաջարկվեց կոնկրետ ժամանակ: Ինչ վերաբերում է թափուկի բնորոշմանը, անտառային կոմիտեի նախագահը տեղեկացրեց, որ թափուկի նկարագիրը հաստատված է օրենքով: Մարզպետ Վահե Ղալումյանն ընդգծեց, որ խնդիրը ոչ միայն սոցիալական է, այլև բնապահպանական, և այստեղ շատ կարևոր է հարցին առնչվող բոլոր օղակների համագործակցված աշխատանքը: Ու քանի որ մարզի զարգացման հիմնական ուղղությունները գյուղատնտեսությունն ու տուրիզմն են, ուստի, մարզպետի բնորոշմամբ, անտառների պահպանությունը մարզի համար ռազմավարական նշանակության հարց է: Այնուհետև քննարկման մասնակիցները ներկայացրին իրենց տեսակետներն ու մոտեցումները թափուկների կանոնակարգման հարցի վերաբերյալ: Ամփոփելով խորհրդակցությունը՝ մարզպետ Վահե Ղալումյանն ասաց, որ նման հանդիպումներն ու քննարկումները այսուհետ կլինեն պարբերաբար, իսկ հաջորդ հանդիպումներում արդեն կանդրադառնան կոնկրետ հարցերի ու կոնկրետ դեպքերի: