Տավուշի մարզպետի աշխատակազմ

Այսօր Տավուշի մարզպետ Վահե Ղալումյանն աշխատանքային խորհրդակցություն անցկացրեց, որին մասնակցում էին մարզպետի տեղակալ Տիգրան Թամրազյանը, կրթության, մշակույթի և սպորտի վարչության գլխավոր մասնագետ Խաչատուր Խաչատրյանը, Դեբեդավանի միջնակարգ դպրոցի տնօրեն Մարինե Հարությունյանն ու փոխտնօրեն, կառավարման խորհրդի նախագահ Լուսինե Գևորգյանը: Քննարկեցին դպրոցում միջանձնային փոխհարաբերությունների պատճառով ստեղծված լարված իրավիճակը: Մարզպետը նշեց, որ պետք է եզրեր գտնել, աշխատանքային մթնոլորտ ստեղծել և կատարել օրենքով սահմանված բոլոր գործառույթները: Անթույլատրելի է, որ նման իրավիճակի պատճառով տուժեն ուսումնական գործընթացն ու աշակերտը: Մարզպետը հանձնարարեց, որ յուրաքանչյուրն իր լիազորությունների սահմանում աշխատի, հանձնարարականը փոխանցեն ամբողջ աշխատակազմին, բարոյահոգեբանական մթնոլորտն առողջացնելու հարցը քննարկման դնեն նաև մանկավարժական խորհրդի նիստում և անցնեն բնականոն աշխատանքի: Եվ զգուշացրեց նաև, որ ցանկացած թերացման կամ խախտման դեպքում, խնդիրը լուծվելու է միայն համապատասխան կարգավորող օրենքի սահմաններում: