Տավուշի մարզպետի աշխատակազմ

 Համայնքին վերաբերող իրենց խնդիրներով այսօր առավոտյան Տավուշի մարզպետի մոտ ընդունելության էին եկել Ազատամուտ համայնքի մի խումբ բնակիչներ ու ավագանու անդամներ: Հանդիպմանը, որին ներկա էին մարզպետի տեղակալները, աշխատակազմի ղեկավարը, համապատասխան ստորաբաժանումների ղեկավարները, քննարկվեցին համայնքի բնակիչներին ու ավագանուն անհանգստացնող մի շարք հարցեր: Ազատամուտցիները մարզպետին ներկայացրին, որ համայնքում ծագած լարված իրավիճակն ու բոլոր խնդիրները արդյունք են համայնքապետի ոչ բաց ու ոչ թափանցիկ աշխատանքի: Համայնքի ղեկավարը հրաժարվում է ավագանուն տրամադրել այն փաստաթղթերը, որոնք վերաբերում են բնակիչներին տրված սոցիալական օգնություններին, գույքագրման ցուցակներին, գույքի վարձակալության պայմանագրերին: Բավարար չեն ավագանուն տրամադրված աշխատասենյակի պայմանները: Ամփոփելով քննարկումը՝ մարզպետ Վահե Ղալումյանը խոստացավ մեկ ժամից լինել Ազատամուտում և հենց տեղում մոտիկից ծանոթանալ բոլոր խնդիրներին և միասին քննարկել դրանց լուծման տարբերակները: