Տավուշի մարզպետի աշխատակազմ

 ,,Էրեբունի,, բժշկական կենտրոնի տնօրինության նախաձեռնությամբ այսօր բարեգործական ակցիայով Տավուշի մարզում էին կենտրոնի մի խումբ առաջատար մասնագետներ՝ անոթային վիրաբուժության ծառայության ղեկավար Արամ Բադալյանը, էնդոկրինոլոգ Արմինե Սանամյանը, առիթմալոգիայի ծառայության ղեկավար Միհրան Մարտիրոսյանը, պրոկտոլոգիայի ծառայության ղեկավար Կարեն Շահնազարյանը: Առավոտից ճանաչված բժիշկները Իջևանի բժշկական կենտրոնում անվճար բժշկական ծառայություն մատուցեցին ավելի քան երեք տասնյակ հիվանդների: Բարձրակարգ բժիշկները կատարեցին խորհրդատվություն, անցկացրին ախտորոշիչ հետազոտություններ, տվեցին համապատասխան ցուցումներ: Իսկ նեղ մասնագիտությունների գծով հետազոտման կարիք ունեցողները ուղղորդվեցին մասնագիտացված կլինիկաներ:
  Բարեգործական ակցիայով Տավուշի մարզ ժամանած բժիշկները հանդիպեցին նաև մարզպետ Հովիկ Աբովյանի հետ: Հանդիպման ընթացքում մարզպետը շնորհակալություն հայտնեց միջոցառման կազմակերպիչներին՝ կարևորելով նման ակցիաների կազմակերպումը սահմանամերձ մարզի համար և առաջարկեց, որպեսզի դրանք լինեն շարունակական: Բժիշկները խոստացան, որ ակցիան կլինի շարունակական, և նոր հիվանդների հավաքագրումից հետո արդեն կնշանակեն հաջորդ այցի օրն ու մեծ սիրով հերթական բարեգործությամբ կրկին կայցելեն մարզ: