Տավուշի մարզպետի աշխատակազմ

   Այսօր Տավուշի մարզպետարանում տեղի ունեցավ խորհրդակցություն, որտեղ ամփոփվեցին ՀՀ ԱԻՆ Տավուշի մարզի տարածքային ստորաբաժանումների 2017թ. գործունեության արդյունքները: Խորհրդակցությանը ներկա էին ՀՀ արտակարգ իրավիճակների նախարարության աշխատակազմի ղեկավար Գագիկ Հայրապետյանը և ՀՀ ԱԻՆ ՓԾ տնօրենի տեղակալ, գնդապետ Արտուշ Խաչիկյանը: Մասնակցում էին մարզպետի տեղակալ Լևոն Սարգսյանը, մարզպետարանի ու ոլորտի պատասխանատուներ, մարզի ուժային կառույցների ներկայացուցիչներ, համայնքների ղեկավարներ: Խորհրդակցությունը բացեց ՀՀ Տավուշի մարզպետ Հովիկ Աբովյանը: Մարզպետը նախ շնորհավորեց բոլորին անցած տոների կապակցությամբ, այնուհետև անցավ օրակարգի առաջին հարցին, որով Տավուշի մարզային փրկարարական վարչության պետ, փ/ծ գնդապետ Արթուր Հովակիմյանը հանդես եկավ 2017թ. կատարած աշխատանքների հաշվետվությամբ: Զեկուցողը ներկայացրեց ՀՀ ԱԻՆ Տավուշի ՄՓՎ գործունեության ուղղությունները, անդրադարձավ տարվա ընթացքում գրանցված արտակարգ դեպքերի վիճակագրությանը: Նշվեց, որ արձանագրված դեպքերի 83,9 տոկոսը հրդեհի դեպքերն են: Հաշվետու ժամանակաշրջանում Տավուշի ՄՓՎ ստորաբաժանումների և օպերատիվ խմբերի կողմից արտակարգ դեպքերի, պատահարների հետևանքների վերացման նպատակով իրականացվել է 516 ելք՝ նախորդ տարվա 363-ի դիմաց: Տարվա ընթացքում տարաբնույթ ուսումնավարժություններ ու վարժանքներ են անցկացվել՝ ուղղված բնակչության պաշտպանության համակարգի օպերատիվ նախապատրաստմանը: Հաշվի առնելով մարզում տարերային և տեխնածին աղետների սպառնալիքները՝ իրականացվել են դրանց կանխատեսման, կանխարգելման և հետևանքների նվազեցմանն ուղղված մի շարք միջոցառումներ: Զգալի աշխատանք է կատարվել քաղպաշտպանության համակարգի զարգացման ուղղությամբ: Վարչության ստորաբաժանումներում անց են կացվել հատուկ տակտիկական ուսումնավարժություններ: 2017թ. ընթացքում իրենց լավ աշխատանքի համար խրախուսվել են 78 փրկարարական ծառայողներ՝ նախորդ տարվա 19-ի փոխարեն: Նրանցից 67-ը պարգևատրվել են մեդալով, իսկ 11-ը արժանացել են շնորհակալագրերի: Ա. Հովակիմյանն անդրադարձավ նաև նյութատեխնիկական ապահովման հարցերին: Նշվեց, որ, չնայած կատարված աշխատանքներին, դեռևս կան խնդիրներ: Հրդեհաշիջման աշխատանքներն ավելի արդյունավետ կազմակերպելու նպատակով որպես առաջնային կարևորության խնդիր ներկայացվեց գյուղերում ջրավազանների, հարմարեցված հարթակների կառուցումը: Օրակարգի հաջորդ հարցով 2017թ. գործունեության արդյունքները ներկայացրեց Տավուշի մարզային հրդեհային և տեխնիկական անվտանգության տեսչության պետ Արմեն Համբարձումյանը: Նշվեց, որ տարվա ընթացքում գրանցվել է հրդեհի 152 դեպք: Զոհեր չեն եղել: Հրդեհների մեծ մասը եղել է չհնձված չոր խոտածածկույթներում, այգիներում, բնակելի զանգվածում: Հաջորդիվ ՀՀ ԱԻՆ ,,Սեյսմիկ պաշտպանության ծառայություն,, գործակալության Հյուսիսային ծառայության տնօրեն Կարեն Մխիթարյանը զեկուցեց հաշվետու տարում իրենց կատարած աշխատանքների մասին: Ներկայացվեցին սեյսմիկ կայանների արդյունավետությունն ու սեյսմիկ ռիսկերի գնահատման արդյունքները: Զեկուցողը հույս հայտնեց, որ այս տարվա սկզբներին Տավուշի մարզը ևս կունենա սեյսմիկ կայան: 2017թ. կատարած աշխատանքները ներկայացրին նաև ,,Հիդրոօդերևութաբանության և մոնիթորինգի պետական ծառայություն,, պետական ոչ առևտրային կազմակերպության Տավուշի մարզային ստորաբաժանման պետ Եղյա Սայադյանը և ,,Տեխնիկական անվտանգության ազգային կենտրոն,, պետական ոչ առևտրային կազմակերպության Լոռի-Տավուշ տեխնիկական անվտանգության փորձագետ Մարգարիտա Հազոյանը: Մ. Հազոյանը իր զեկույցում նշեց, որ 2017թ. Տավուշի մարզում կնքվել է տեխնիկական անվտանգության փորձաքննության 164 պայմանագիր, որի արդյունքում փորձաքննության է ենթարկվել 199 օբյեկտ: Փորձաքննության իրականացման գործընթացին էապես նպաստել է շարժական լաբորատորիայի կիրառումը, որը հնարավորություն է տվել փորձաքննության ընթացքում կատարել նաև դիագնոստիկա, փորձարկում և զննում: Հաշվետու ժամանակաշրջանում մարզում տեխնածին վթարներ չեն եղել: ՀՀ արտակարգ իրավիճակների նախարարության աշխատակազմի ղեկավար Գագիկ Հայրապետյանն իր եզրափակիչ խոսքում նշեց, որ 2017թ. ընթացքում մեծ ծավալի աշխատանքներ են կատարվել և ՀՀ ԱԻՆ Տավուշի մարզի տարածքային ստորաբաժանումների 2017թ. գործունեությունը գնահատեց ,,լավ,,: Նա նաև նշեց այն երեք հիմնական հարցերը, որոնք գտնվում են նախարարության ուշադրության կենտրոնում: Դրանք են՝ քաղպաշտպանության ուժերը, որոնց մեծ նշանակություն է տրվում, հաջորդը հենակետերի տեխնիկական վերազինումն է ամենաժամանակակից տեխնիկայով և երրորդը աղետների ռիսկերի գնահատման հարցն է, առանց որի անհնար է համայնքների զարգացումը: Ամփոփելով խորհրդակցությունը՝ մարզպետ Հովիկ Աբովյանը շնորհակալություն հայտնեց ՀՀ արտակարգ իրավիճակների նախարարությանը աջակցության և համատեղ աշխատանքի համար, նշեց, որ թե մարզպետարանի և թե անձամբ իր մշտական ուշադրության կենտրոնում են տեղական ինքնակառավարման մարմինների հետ կապված խնդիրները, կապը համայնքների ղեկավարների հետ ամենօրյա է և որ համատեղ ուժերով կլուծվեն բոլոր խնդիրները: