Տավուշի մարզպետի աշխատակազմ

Մայիսի 18-ին Տավուշի մարզպետարանում տեղի ունեցավ ,,Զվարթնոց,, հայ երգի մրցույթ-փառատոնի մրցանակաբաշխությունը: ,,Զվարթնոցն,, արդեն ավանդական դարձած փառատոն է, կազմակերպվում է նույնանուն հիմնադրամի կողմից Հայաստանի բոլոր մարզերում և Արցախի հանրապետությունում: Մասնակցում են ոչ մասնագիտական հաստատությունների շնորհաշատ երեխաները, երիտասարդները, 8-32 տարեկան բոլոր ցանկացողները: Փառատոնի նպատակն է երգի միջոցով երեխաներին մոտեցնել արվեստին, ուղղորդել նրանց դեպի հայ մշակույթի ուսումնասիրություն: Այս տարի Տավուշի մարզի տարբեր համայնքներից փառատոնի մրցանակակիր են դարձել 17 մասնակից՝ հանդես գալով 3 ժանրով՝ դասական, ժողովրդական և էստրադային: Հատուկ մրցանակակիրը նույնպես Տավուշի մարզից էր՝ որպես ամենակրտսերը: Մրցանակակիրներին ողջունեցին Տավուշի մարզպետի տեղակալ Լևոն Սարգսյանը և մարզպետարանի աշխատակազմի կրթության, մշակույթի, սպորտի վարչության պետ Կարեն Նազարյանը: Փառատոնի կազմակերպիչների կողմից մրցանակակիրները լավագույնս հանդես գալու համար ստացան պատվոգրեր, իսկ Տավուշի մարզպետ Հովիկ Աբովյանի կողմից՝ շնորհակալագրեր: Պատվոգրեր ստացան նաև կազմակերպիչներին աջակցած համայնքների ղեկավարները, կրթական հաստատությունների տնօրենները: