Տավուշի մարզպետի աշխատակազմ

  2016 թվականի հոկտեմբեր–նոյեմբեր ամիսների ընթացքում ՀՀ վարչապետի մարզային այցելությունների արդյունքներով մարզերում և համայնքներում ձևավորվել է ներդրումային ծրագրերի մշակման և ներկայացման գործընթացը:
Ներդրողների կողմից ՀՀ տարածքային կառավարման և զարգացման նախարարություն ներկայացվել են թեթև արդյունաբերության, զբոսաշրջության զարգացման, գյուղմթերքի վերամշակման, հանքարդյունաբերության, վերականգնվող էներգիայի արտադրության, անասնապահության, մետաղագործության, մեքենատրակտորային կայանների ստեղծման ոլորտներին առնչվող շուրջ 140 ներդրումային ծրագրերի հայտեր:
  Առավել իրատեսական 11 ծրագրեր 2017թ. փետրվարի 21-ին ներդրողների մասնակցությամբ քննարկվել էին ՀՀ վարչապետ Կարեն Կարապետյանի մոտ: Քննարկումների արդյունքներով տրված հանձնարարականների համաձայն արդեն իսկ 2 ծրագիր ֆինանսավորվել է, իսկ մյուս 9 ծրագրի մասով ընթանում են ֆինանսական գործիքների և մեխանիզմների աջակցության գործընթացները:
  Մասնավորապես, Լոռու մարզից ստացված «Ֆերմերային տնտեսության զարգացում» ծրագրով ակնկալվող 35,0 մլն. ՀՀ դրամ գումարից 14.03.2017թ-ին տրամադրվել է վարկի 1-ին փուլը՝ 20,0 մլն. ՀՀ դրամ գումարի չափով` տարեկան 12% տոկոսադրույքով: Վարկի առաջին փուլի ծախսման հիմնավորումները ներկայացնելուց և մոնիթորինգ իրականացնելուց հետո կտրամադրվի վարկի 2-րդ փուլը` 15,0 մլն. ՀՀ դրամ գումարի չափով: ՀՀ Տավուշի մարզից էլ ստացված «Ժամանակակից տեխնոլոգիաներով բազմաբերք ելակի արտադրություն» ծրագրով ակնկալվող 10,0 մլն. դրամ վարկային միջոցները տրամադրվել են տարեկան 10% տոկոսադրույքով` 14.03.2017թ-ին կնքված պայմանագրի հիման վրա:
 Միաժամանակ, Արագածոտնի մարզի «Մետաղի հղկումից և մշակումից պատրաստվող իրերի արտադրության հիմնում» ներդրումային ծրագրով ակնկալվող 15,0 մլն. ՀՀ դրամ գումարից 2017 թվականի ապրիլ ամսվա 3-րդ տասնօրյակում նախատեսվում է 5,0 մլն. ՀՀ դրամը տարեկան 4% տոկոսադրույքով տրամադրել Հայաստանի ՓՄՁ ԶԱԿ հիմնադրամի «Սիրիահայերի աջակցության ծրագրի>> շրջանակներում, իսկ 10 մլն. ՀՀ դրամը` «ՓՄՁ ներդրումներ>> Ունիվերսալ Վարկային Կազմակերպություն ՓԲԸ վարկավորման հաշվին` տարեկան 11% տոկոսադրույքով:
 Արագածոտնի մարզի ««Ոսկեվազ» գինու գործարանի ընդլայնում և զբոսաշրջության նոր ուղղությունների զարգացում» ներդրումային ծրագրով ակնկալվող 300,0 մլն. ՀՀ դրամը նախատեսվում է տրամադրել տարեկան 12% տոկոսադրույքով և 3% սուբսիդավորմամբ (վարկի առաջին 2 տարվա համար): Նույն մարզում «Էկոտուրիզմի և հանգստյան գոտու հիմնում` «Էկոմյունիթի»» ծրագրի իրագործման նպատակով` ներկայումս ընթանում են էկոթաղամասի համար նախատեսված 4,0 հա մակերեսով հողատարածքի գործառնական նշանակության փոփոխության գործընթացները:
 Շիրակի մարզի «Բասեն հյուրանոցային համալիրի, առևտրի կենտրոնի կառուցում և հանրային սննդի կազմակերպում» ծրագրի իրագործման նպատակով էլ ներկայումս ընթանում են «Բասենի Գովք» ՍՊԸ-ին անհատույց սեփականության իրավունքով Գյումրի քաղաքի նախկին Շիրակ հյուրանոցի շինության և հողամասի նվիրատվության գործընթացները: Մնացած 5 ներդրումային ծրագրերի մասով ընթանում են դրանց ֆինանսական գործիքների և մեխանիզմների աջակցության ուսումնասիրության գործընթացները:

http://mtad.am