Տավուշի մարզպետի աշխատակազմ

 Այսօր Տավուշի մարզպետարանի ուսումնական կենտրոնում տեղի ունեցավ դասընթաց-քննարկում, որին մասնակցում էին մարզպետարանի պատասխանատուներ, ԳԱՄԿ-ի ներկայացուցիչներ ու խորհրդատուներ, տարբեր ոլորտների ֆերմերներ, կոոպերատիվների անդամներ: Բացելով դասընթացը՝ Տավուշի մարզպետարանի գյուղատնտեսության և բնապահպանության վարչության պետ Վաղարշակ Սուքոյանը նշեց, որ ՀՀ վարչապետի հանձնարարականներից ելնելով՝ գյուղատնտեսության ոլորտում կարևորվում է կապը գիտության, կրթության հետ, նոր տեխնոլոգիաների ներդրումը: Եվ այսօրվա դասընթացն էլ առնչվում է այդ հարցերին: Այնուհետև Հայաստանի պետական ագրարային համալսարանի ագրոբիզնեսի և շուկայաբանության ֆակուլտետի դեկան Հրաչիկ Ջավադյանը ներկայացրեց ,,Գյուղատնտեսական կոոպերատիվների կազմակերպման խոչընդոտները և հաղթահարման միջոցառումները ՀՀ-ում,, թեման: Նույն համալսարանի աշխատակից Հայկ Ղազարյանը անդրադարձավ ագրոբիզնեսի կազմակերպման և կառավարման հարցերին, իսկ Արա Հովհաննիսյանը խոսեց պտղաբուծության և խաղողագործության մասին: Զորիկ Փամբուխչյանի զեկույցը վերաբերում էր անասնաբուծության զարգացմանը: Դասընթացն անցավ աշխույժ հարց ու պատասխանի մթնոլորտում: Դասընթացի մասնակիցները ներկայացրին նաև իրենց առաջարկությունները քննարկված հարցերի վերաբերյալ: