Տավուշի մարզպետի աշխատակազմ

Այսօր Տավուշի մարզպետարանում տեղի ունեցավ խորհրդակցություն, որտեղ ներկայացվեցին ՀՀ արտակարգ իրավիճակների նախարարության փրկարար ծառայության Տավուշի մարզային փրկարարական վարչության 2016 թվականի գործունեության արդյունքները: Մասնակցում էին ՀՀ ԱԻՆ փրկարարական ծառայության տնօրենի տեղակալ, փրկարար ծառայության գեներալ-մայոր Աստվածատուր Պետրոսյանը, ՀՀ ԱԻՆ ,,Սեյսմիկ պաշտպանության ծառայություն,, գործակալության պետ Հրաչյա Պետրոսյանը, մարզի ուժային կառույցների ներկայացուցիչներ, համայնքների ղեկավարներ, ոլորտի պատասխանատուներ: Հաշվետու խորհրդակցությունը վարեց ՀՀ Տավուշի մարզպետ Հովիկ Աբովյանը: Մինչ աշխատանքներն սկսելը, մարզպետի առաջարկությամբ, ներկաները հարգեցին ՀՀ ԱԻ նախկին նախարար Արմեն Երիցյանի հիշատակը: Այնուհետև հաշվետու զեկուցումով հանդես եկավ ՀՀ ԱԻՆ Տավուշի մարզային փրկարարական վարչության պետ, փրկարար ծառայության գնդապետ Արթուր Հովակիմյանը: Նա նշեց, որ տարվա ընթացքում իրենց գործունեությունն ունեցել է հիմնական 4 ուղղություն. արտակարգ իրավիճակների առաջացման կանխարգելման, դրանց հնարավոր հետևանքների նվազեցման, արտակարգ իրավիճակներում բնակչության պաշտպանության միջոցառումների իրականացում, Տավուշի մարզի քաղաքացիական պաշտպանության համակարգի կատարելագործում, արտակարգ իրավիճակների և քաղաքացիական պաշտպանության հիմնահարցերով Տավուշի մարզում ուսումնական գործընթացի կազմակերպում և իրականացում, արտակարգ դեպքերի արձագանքման կազմակերպման արդյունավետության բարձրացում: Զեկուցողը մանրամասն ներկայացրեց 2016 թվականին արձանագրված արդյունքները, անդրադարձավ ոլորտի խնդիրներին: Տեղեկացվեց, որ 2016թ. ընթացքում ՀՀ ԱԻՆ ՓԾ Տավուշի ՄՓՎ ճգնաժամային կառավարման կենտրոնի ,,911,, տարածքային ահազանգման կենտրոնում գրանցվել է 46278 զանգ, որից 363-ը՝ արտակարգ պատահարների վերաբերյալ: 78 ահազանգի դեպքում իրականացվել է տեղեկատվության փոխանցում այլ ծառայությունների: Գրանցված դեպքերից 274-ը տեխնածին են: Արտակարգ դեպքերի հետևանքով զոհվել է 11, վիրավորվել՝ 40 մարդ:
2016 թվականի կատարած աշխատանքները ներկայացրին նաև մարզային հրդեհային և տեխնիկական անվտանգության տեսչության պետ Արմեն Համբարձումյանը, ,,Սեյսմիկ պաշտպանության ծառայություն,, գործակալության հյուսիսիային ծառայության պետ Կ. Մխիթարյանը, ,,Հիդրոօդերևութաբանության և մոնիտորինգի պետական ծառայության Դիլիջանի կայանի պետ Վարդան Անտոնյանը: Տեխնիկական անվտանգության ազգային կենտրոնի Տավուշի մարզային փորձաքննական բաժանմունքի պետ Գևորգ Խուդավերդյանը զեկուցեց 2016 թվականի ընթացքում իրականացրած տեխնիկական անվտանգության փորձաքննության արդյունքների մասին: Տավուշի մարզի տարածքային ստորաբաժանումների 2016 թվականի գործունեության արդյունքների գնահատմամբ հանդես եկան գեներալ-մայոր Աստվածատուր Պետրոսյանը և ՀՀ ԱԻՆ ,,Սեյսմիկ պաշտպանության ծառայություն,, գործակալության պետ Հրաչյա Պետրոսյանը: Գեներալը բարձր գնահատեց հաշվետու տարում մարզի փրկարարների կատարած աշխատանքը: Նրանք շնորհակալություն հայտնեցին ՀՀ Տավուշի մարզպետ Հովիկ Աբովյանին, համայնքների, մարզի պետական կառույցների ղեկավարներին համագործակցված աշխատանքի համար: Խորհրդակցությունն ամփոփեց Տավուշի մարզպետ Հովիկ Աբովյանը: Նա ընդգծեց, որ, իր դիտարկմամբ, մարզային վարչությունում իրականացրած կադրային փոփոխությունները դրական արդյունք են տվել: Մարզպետը շնորհակալություն հայտնեց ՀՀ արտակարգ իրավիճակների նախարարությանը, Ազգային անվտանգության ու ոստիկանության մարզային ու տարածքային մարմիններին աջակցության ու համատեղ աշխատանքի համար: Մարզպետը նաև շեշտեց, որ դեռ խնդիրներ կան և համոզմունք հայտնեց, որ ընթացիկ տարվա մեջ համակարգված մոտեցումների շնորհիվ նաև դրանց լուծում կտրվի: