Տավուշի մարզպետի աշխատակազմ

  Այսօր Տավուշի մարզի Ազատամուտի միջնակարգ դպրոցի հյուրն էին ՄԱԿ-ի Պարենի համաշխարհային կազմակերպության ներկայացուցիչները: Հանդիպման առիթը ստեղծել էր դպրոցի 4-րդ դասարանի սան Հարություն Սարիբեկյանը, ով հաղթող է ճանաչվել ,,Կայուն դպրոցական սնունդ,, ծրագրում ընդգրկված երեխաների համար կազմակերպության կողմից հայտարարված նկարչության մրցույթում: Ողջունելով հյուրերին՝ դպրոցի տնօրեն Լարիսա Հակոբյանն այնուհետև համառոտ ներկայացրեց հաստատության ձեռքբերումները: Նշվեց, որ արդեն որերորդ անգամ կրթօջախի սաները հաղթող են ճանաչվում ՄԱԿ-ի պարենի համաշխարհային ծրագրի կողմից անցկացվող մրցույթներում: Այս անգամ մրցույթին մասնակցած 14 երկրների հազարից ավելի աշխատանքներից եզրափակիչ փուլ են դուրս եկել 70-ը, որոնցից էլ վերջնական հաշվով հաղթող են ճանաչվել 20-ը: Այդ 20 լավագույնների մեջ է ընդգրկված նաև Հարություն Սարիբեկյանի աշխատանքը: Հարությունը նկարում պատկերել է Մասիսը, իսկ նրա լանջին՝ հայկական եռագույնը:
  Նման մեծամասշտաբ մրցույթում հաղթելու համար շնորհավորեց և մրցույթի հաղթողի համար սահմանված մրցանակները՝ դրամական պարգևը և գրենական պիտույքների փաթեթը, հանդիսավոր պայմաններում Հարությունին հանձնեց ՄԱԿ-ի պարենի համաշխարհային ծրագրի ղեկավար Գրիգորի Գրիգորյանցը: Դպրոցական պարագաներ գնելու նպատակով դրամական պարգև հանձնվեց նաև Ազատամուտի դպրոցին: Նկարչության միջազգային մրցույթում հաղթած Հարությունին, ուսուցչուհի Անահիտ Եգանյանին ու դպրոցի տնօրինությանը շնորհավորեց ու նորանոր հաջողություններ մաղթեց նաև Տավուշի մարզպետարանի կրթության, մշակույթի և սպորտի վարչության պետ Կարեն Նազարյանը: