Տավուշի մարզպետի աշխատակազմ

Սիրելի շրջանավարտներ
Ջերմորեն շնորհավորում եմ Ձեզ կյանքում ամենահիշարժան օրերից մեկի՝ Վերջին դպրոցական դասի ու Վերջին զանգի կապակցությամբ:Այսօր դուք հրաժեշտ եք տալիս հարազատ կրթօջախին, սիրելի ուսուցիչներին ու դասընկերներին: Այս տարիների ընթացքում դուք հիմնավոր գիտելիքներ եք ստացել, Ձեզ սովորեցրել են լինել ազնիվ, երկրին ու հարազատ ժողովրդին նվիրված քաղաքացիներ: Սա Վերջին զանգն է, որը սակայն ավետում է կյանքի կարևոր մի շրջափուլի մասին, որտեղ Ձեզնից պահանջվում է լինել առավել շրջահայց, զգոն ու իմաստուն: Վստահ եմ, որ դպրոցական տարիներին ձեռք բերած գիտելիքները լավ հիմք կհանդիսանան մասնագիտական ճիշտ ընտրության և կյանքում անխուսափելի դժվարությունները հաղթահարելու համար:
Սիրելի մանկավարժներ, ծնողներ, շնորհավորում եմ նաև Ձեզ: Այսօր նաև Ձեր տոնն է: Դուք այսօր կյանք եք ճանապարհում մի նոր սերունդ, որը դառնալու է մեր երկրի ապագայի կերտման կարևոր մասնակիցը: Մաղթում եմ, որ իրականություն դառնան Ձեր զավակների ու աշակերտների հետ կապված բոլոր իղձերն ու երազանքները:
Իմ պատանի բարեկամներ, մեկ անգամ ևս շնորհավորելով Վերջին զանգի կապակցությամբ, ցանկանում եմ Ձեզ հետագա հաջողություններ, բարեկեցիկ ու ապահով կյանք:
Բարի երթ Ձեզ:
ՀՀ Տավուշի մարզպետ Հովիկ Աբովյան