Տավուշի մարզպետի աշխատակազմ

  Շաբաթ օրը` ապրիլի 30-ին, Տավուշի մարզի Աչաջուր համայնքում անցկացվեց Կյոկուշինկայ կարատեի Տավուշի մարզի առաջնությունը: Տեղեկացնենք, որ մրցաշարը կազմակերպվում է ամեն տարի, և ամեն անգամ այն անց է կացվում մի նոր համայնքում: Իսկ առաջնությունում մրցանակային տեղեր զբաղեցրած մարզիկները իրավունք են ստանում մասնակցելու հանրապետական և միջազգային մրցաշարերին: Մրցումների հիմնական նպատակն է մարտական արվեստ դաստիարակելուն զուգահեռ սահմանին ապրող երիտասարդների մեջ սերմանել ուժ, կորով ու կամք, մարտական հզոր ոգի: Միջոցառմանը ներկա էին Տավուշի մարզպետարանի աշխատակազմի ՏԻ և ՀԳՄ հարցերով վարչության պետ Միշա Մխիթարյանը, գյուղատնտեսության և բնապահպանության վարչության պետ Վաղարշակ Սուքոյանը, զարգացման ծրագրերի և վերլուծության բաժնի պետ Գուրգեն Հարությունյանը, կրթության, մշակույթի և սպորտի բաժնի գլխավոր մասնագետ Արշավիր Թադևոսյանը: Հատուկ հրավերով մրցաշարին ներկա էին ՀՀԿԿՖ-ի նախագահ Կարեն Մանուկյանը և ֆեդերացիայի փոխնախագահ Արթուր Համբարյանը: Մրցավարական կազմը գլխավորում էր Վահագն Մանուկյանը: Միջոցառմանը ներկա էին ոչ միայն աչաջրեցիներ, այլև բազմաթիվ հյուրեր մարզի տարբեր համայնքներից: Մրցաշարի կազմակերպման հեղինակներն էին Տավուշի մարզի Կյոկուշինկայ կարատեի գլխավոր մարզիչ Ստեփան Սարհատյանը /սև գոտի 1-ին դան/ և Արայիկ Թուխիկյանը /սև գոտի 1-ին դան/: Մրցումներին մասնակցեց ընդհանուր թվով 100 մարզիկ` ցուցադրելով գեղեցիկ ու դիտարժան ելույթ: Հաղթողները պարգևատրվեցին համապատասխան կարգի մեդալներով ու դիպլոմներով: