Տեղեկատվական կենտրոն
Նորություններ
Առաջնությունը նվիրված էր Մեծ եղեռնի 101-րդ տարելիցին
27.04.2016
Ապրիլի 26-ին ԵՊՀ Իջևանի մասնաճյուղում անցկացվեց Հայոց մեծ եղեռնի 101-րդ տարելիցին նվիրված վոլեյբոլի մարզային առաջնություն: Մրցապայքարն անցավ մասնակից 8 թիմերի միջև: Դրանք էին Նոյեմբերյանի, Դիլիջանի, Գանձաքարի, Սարիգյուղի, Այգեհովիտի, Ներքին Ծաղկավանի, Պտղավանի և ԵՊՀ Իջևանի մասնաճյուղի թիմերը: Խաղերն ընթացան օլիմպիական ձևով. պարտվողը դուրս էր մնում հետագա մրցակցությունից: Արդյունքում եզրափակիչ դուրս եկան ԵՊՀ Իջևանի մասնաճյուղի և Պտղավանի թիմերը: Համառ պայքարում 2:1 հաշվով հաղթեց ԵՊՀ Իջևանի մասնաճյուղի հավաքականը` գրավելով 1-ին տեղը: Պտղավանի թիմը մնաց 2-րդ հորիզոնականում: Մրցումներից հետո տեղի ունեցավ պարգևատրման արարողություն: Երկու թիմերի անդամներն էլ պարգևատրվեցին համապատասխան կարգի մեդալներով ու պատվոգրերով, իսկ 1-ին տեղ գրաված թիմը արժանացավ նաև մասնաճյուղի տնօրինության կողմից նախատեսված փոխանցիկ գավաթին: ԵՊՀ ԻՄ հավաքականին պարգևները հանձնեց ՀՀ Տավուշի մարզպետարանի աշխատակազմի կրթության, մշակույթի ու սպորտի վարչության գլխավոր մասնագետ Արշավիր Թադևոսյանը, իսկ Պտղավանի թիմին` ԵՊՀ ԻՄ աշխատակից Յուրա Բեկնազարյանը: