Տավուշի մարզպետի աշխատակազմ

 Այսօր Իջևանի տարածաշրջանի Աչաջուր համայնքի մշակույթի տանը հանդիսավորությամբ բացվեց շախմատի ակադեմիայի մասնաճյուղ, որի մուտքի ժապավենը կտրեցին ՀՀ Տավուշի մարզպետ, Տավուշի մարզի շախմատի ֆեդերացիայի նախագահ Հովիկ Աբովյանը և Հայաստանի շախմատի ֆեդերացիայի փոխնախագահ, գրոսմայստեր Սմբատ Լպուտյանը: Արարողությանը ներկա էին բազմաթիվ աչաջրեցիներ, դպրոցականներ ու հյուրեր: Շնորհավորելով ներկաներին մասնաճյուղի բացման կապակցությամբ` գրոսմայստեր Սմբատ Լպուտյանը նշեց, որ մեծ է շախմատի դերը երեխայի մեջ ստեղծագործական միտք, աշխատասիրություն, ազնվություն դաստիարակելու գործում: Մասնաճյուղի բացման առթիվ աչաջրեցիներին շնորհավորեց նաև մարզպետ Հովիկ Աբովյանը: Նա իր շնորհակալությունը հայտնեց Հայաստանի շախմատի ակադեմիային, անձամբ Սմբատ Լպուտյանին մարզի շախմատային կյանքի հանդեպ ունեցած առանձնահատուկ վերաբերմունքի ու մշտական աջակցության համար` նշելով, որ մարզում գնալով մեծ թափ է ստանում շախմատը: Մարզպետն իր խոսքում կարևորեց շախմատի դերը երեխայի տրամաբանության, արագ կողմնորոշման գործում, որն այսօր շատ կաևոր է սահմանին ապրող տավուշցու համար: Գրոսմայստեր Սմբատ Լպուտյանը նաև հաճելի անակնկալ մատուցեց գյուղի փոքրիկ շախմատիստներին` նրանց հետ անցկացնելով միաժամանակյա խաղի սեանս: