Տավուշի մարզպետի աշխատակազմ

  Տավուշի մարզային գրադարանում տեղի ունեցավ <<Ցայգալույսի թռչնականչ>> բանաստեղծությունների տարեգրքի շնորհանդեսը, որի հեղինակներն են գրադարանի ընթերցողները՝ Երևանի պետական համալսարանի Իջանի մասնաճյուղի ուսանողները: Տարեգրքում ներառված է պատանի ստեղծագործողների չափածո գործերի անդրանիկ ընտրանին, որտեղ հստակ իրենց արտացոլանքն են գտել մեր օրերի մարդու խոհերն ու հետաքրքրությունները: ԵՊՀ Իջևանի մասնաճյուղի հումանիտար գիտությունների ֆակուլտետի հայոց լեզվի և գրականության ամբիոնի ասիստենտ Ալիսա Հասանյանն իր խոսքի մեջ ներկայացրեց գրքում տեղ գտած հեղինակներին, ինչպես նաև տվեց իր մասնագիտական գնահատականը բանաստեղծությունների հեղինակներին: Տավուշի թեմի առաջնորդ Բագրատ եպիսկոպոս Գալստանյանը շնորհակալություն հայտնեց գրադարանի տնօրինությանը նման միջոցառման կազմակերպման համար` վստահություն հայտնելով, որ երիտասարդ ստեղծագործողները անպայման կգտնեն իրենց տեղը գրականության աշխարհում և, ինչու չէ, կդառնան ճանաչված ու հայտնի: Իսկ Տավուշի մարզպետարանի աշխատակազմի կրթության, մշակույթի և սպորտի վարչության առաջատար մասնագետ Մարինե Խաչատրյանը Տավուշի մարզպետ Հովիկ Աբովյանի շնորհավորական խոսքը փոխանցեց պատանի ստեղծագործողներին ու միջոցառման մասնակիցներին և գիրք նվիրելու օրվա կապակցությամբ գեղարվեստական գրքեր նվիրեց գրադարանին: Միջոցառումն ամփոփեց մարզային գրադարանի տնօրեն Անահիտ Ղուկասյանը, ով իր գոհունակությունն ու շնորհակալությունը հայտնեց բոլոր ներկա գտնվողներին` նման գեղեցիկ միջոցառման մասնակիցը լինելու և միջոցառման կայացմանն աջակցելու համար ու խոստացավ հնարավորինս աջակցել ստեղծագործող երիտասարդների բացահայտմանն ու կայացմանը: