Տավուշի մարզպետի աշխատակազմ

 Այսօր Տավուշի մարզպետարանի ուսումնական կենտրոնում տեղի ունեցավ միջոցառում, որտեղ ներկայացվեց Օրգանական գյուղատնտեսության աջակցության նախաձեռնության /ՕԳԱՆ/ դրամաշնորհային ծրագրի հայտամրցույթի հրավերը: Նշենք, որ ծրագիրն իրականացնում է Ավստրիայի զարգացման գործակալությունը /ԱԶԳ/ ԵՄ-ի և ԱԶԳ-ի ֆինանսական աջակցության շրջանակներում: Մասնակցում էին Տավուշի մարզպետարանի գյուղատնտեսության ոլորտի պատասխանատուներ, ԳԱՄԿ-ի աշխատակիցներ, ֆերմերներ, ֆերմերային տնտեսությունների, գյուղատնտեսական գործունեությամբ զբաղվող հասարակական կառույցների ներկայացուցիչներ: Ծրագրի նպատակը օրգանական գյուղատնտեսության խթանումն է: Ծրագրում հատուկ ուշադրություն է դարձվում կին ֆերմերներին, ֆերմերային խմբերին, կոոպերատիվներին, վերամշակողներին, ինչպես նաև երիտասարդներին և այլ խոցելի խմբերին: Փոքրածավալ դրամաշնորհներ են տրամադրվելու այն  ֆերմերներին, ովքեր փորձում են նախաձեռնել, դիվերսիֆիկացնել կամ ընդլայնել օրգանական արտադրությունը: Իսկ մեծածավալ դրամաշնորհներ կտրամադրվեն արդեն իսկ օրգանական գյուղատնտեսությամբ զբաղվող ֆերմերներին, կոոպերատիվներին և վերամշակողներին արտադրողականության բարձրացման և շուկա մուտք գործելու հնարավորության ընդլայնման համար:
  Հայտամրցույթի հրավերը միջոցառման մասնակիցներին ներկայացրեց դրամաշնորհային ծրագրի ղեկավար Քրիստինե Գրիգորյանը: Նա տեղեկացրեց, որ սկսվել է ՕԳԱՆ ծրագրի հայտամրցույթի մասնակցության համար դիմումների ընդունումը, մանրամասն ներկայացրեց դիմումների ներկայացման կարգը, պատասխանեց միջոցառման մասնակիցներին հետաքրքրող հարցերին: Նշվեց, որ դիմումների ներկայացման վերջնաժամկետ է սահմանված 2016 թվական մարտի 21-ը, տեղական ժամանակով ժամը 16-ը: