Տեղեկատվական կենտրոն
Նորություններ
Ամանորյա ավանդական միջոցառում Դիլիջանի թիվ 2 մանկապարտեզում
24.12.2015
Այսօր Տավուշի մարզի Դիլիջան քաղաքի թիվ 2 մանկապարտեզում ամանորյա ավանդական միջոցառում էր: Հավաքվել էին ծնողներ, այլ կրթական հաստատությունների ներկայացուցիչներ: Ներկա էին Տավուշի մարզպետի տեղակալ Լևոն Սարգսյանը և Դիլիջանի քաղաքապետ Արմեն Սանթրոսյանը: Ինչպես միշտ, այս կրթօջախը տոնակատարությանը հանդես եկավ բարձրաճաշակ թատերական ներկայացմամբ, գրական-երաժշտական կոմպոզիցիայով: Երեխաները երգեցին ու արտասանեցին երեք լեզվով՝ հայերեն, ռուսերեն և անգլերեն: Հանդիսությունն ավարտվեց Ձմեռ պապիկի և Ձյունանուշի այցով, ովքեր , իհարկե, նվերներ էին բերել երեխաների համար: Միջոցառման ավարտին ներկաներին ողջույնի խոսք ասաց մարզպետի տեղակալ Լևոն Սարգսյանը: Նա շնորհակալություն հայտնեց մանկապարտեզի տնօրեն Գրետա Աթաբեկյանին, նրա թիմին՝ համախմբված և արդյունավետ աշխատանքի համար, նշելով, որ Դիլիջանի թիվ 2 մանկապարտեզն օրինակելի նախադպրոցական կրթօջախ է: Լևոն Սարգսյանը կարևորեց մանկապարտեզի դերը երեխայի դաստիարակության հարցում, ընդգծելով, որ մարդու ձևավորումը որպես հասարակության անդամի սկսվում է հենց մանկապարտեզից: Ապա մարզպետի տեղակալը Տավուշի մարզպետ Հովիկ Աբովյանի անունից պատվոգիր հանձնեց Դիլիջանի թիվ 2 մանկապարտեզի տնօրեն Գրետա Աթաբեկյանին երկարամյա գործունեության և բարեխիղճ աշխատանքի համար: Լևոն Սարգսյանը նաև շնորհավորեց ներկաներին գալիք Ամանորի և Սուրբ ծննդյան տոների կապակցությամբ՝ մաղթելով բոլորին առողջություն և հաջողություն:
Միջոցառման մասնակիցներին ու ներկաներին ողջունեց նաև Դիլիջանի քաղաքապետ Արմեն Սանթրոսյանը: Քաղաքապետը շնորհակալություն հայտնեց կազմակերպիչներին և մանկապարտեզի աշխատակազմին, շեշտելով, որ թիվ 2 մանկապարտեզը համայնքի կարևորագույն օղակներից է: Քաղաքապետն իր երախտիքի խոսքը հայտնեց նաև այն կազմակերպություններին ու անհատներին, ովքեր մշտապես կանգնած են մանկապարտեզի և համայնքի կողքին՝ աջակից լինելով բոլոր խնդիրների լուծմանը: Արմեն Սանթրոսյանը խոսքը եզրափակեց շնորհավորանքներով ու բարեմաղթանքներով: