Տեղեկատվական կենտրոն
Նորություններ
Երկօրյա դասընթացներ մանկապարտեզների տնօրենների ու դաստիարակների համար
17.12.2015
<<Երկուսով>> հոգեբանական մասնագիտացված կենտրոնի և <<Վորլդ Վիժն>> միջազգային բարեգործական կազմակերպության Իջևանի տարածքային զարգացման ծրագրի շրջանակներում դեկտեմբերի 16-17-ը երկօրյա դասընթացներ անցկացվեցին Իջևանի պոլիկլինիկայի միջոցառումների դահլիճում, որին մասնակցում էին Սարիգյուղի, Խաշթառակի, Գետահովիտի և Իջևանի թիվ 1 և թիվ 5 մանկապարտեզների տնօրեններն ու դաստիարակները: Դասընթացները միտված են շարունակաբար բարելավելու թիրախային համայնքների մանկապարտեզների ուսուցիչների գիտելիքներն ու հմտությունները երեխայակենտրոն կրթության, ինչպես նաև ներառական կրթության վերաբերյալ: Այդ նպատակով ծրագիրը Տավուշի մարզում ստեղծել է դասավանդողների խմբեր, որոնք էլ վարում են դասընթացները: Իջևանում անցկացված երկօրյա դասընթացները վարեցին փորձառու բժշկուհի Կարինե Դովլաթբեկյանը և Հաղարծին համայնքի մանկապարտեզի տնօրեն Անահիտ Թամրազյանը: Մատուցված թեմաներն էին <<Ժամանակակից նախադպրոցական կրթության և զարգացման չափորոշիչները>>, <<Ուսումնական միջավայրի ստեղծում>> և <<Մանկակենտրոն մտածողություն և վերաբերմունք>>: Դասընթացներն անցան ինտերակտիվ միջավայրում, որտեղ առաջարկվող նոր գաղափարները վեր էին ածվում բանավեճերի և ակտիվ քննարկումների: