Տեղեկատվական կենտրոն
Նորություններ
Միջոցառումը նվիրված էր երեխաների էկոլոգիական դաստիարակությանը
09.12.2015
Դեկտեմբերի 8-ին հետաքրքիր միջոցառում էր կազմակերպվել Սևքարի մանկապարտեզում: Այն էկոլոգիական կրթության մի յուրօրինակ դաս էր, որի հեղինակները մանկապարտեզի փոքրիկներն էին: Միջոցառմանը ներկա էին Տավուշի մարզպետի տեղակալ Լևոն Սարգսյանը, մարզպետարանի կրթության, մշակույթի և սպորտի վարչության պետ Կարեն Նազարյանը, կրթական հաստատությունների տնօրեններ մարզի այլ համայնքներից, ծնողներ ու հյուրեր: Երեխաները երգի, պարի ու արտասանության միջոցով ներկայացրին բնության հանդեպ ունեցած իրենց վերաբերմունքը, վեր հանեցին բնապահպանական խնդիրներ, անդրադարձան աղբահանության ու խելամիտ բնօգտագործման անհրաժեշտության հարցերին: Հանդիսության ընթացքում մանկապարտեզի սաները ցուցադրեցին նաև իրենց ձեռքերով աղբի թափոններից պատրաստած հետաքրքիր դեկորացիաներ, կենցաղում կիրառելի իրեր: Ողջունելով փոքրիկներին` մարզպետի տեղակալ Լևոն Սարգսյանը կարևորեց նման միջոցառումների կազմակերպումը` նշելով, որ երեխան էկոլոգիական գիտելիքներ ու դաստիարակություն պետք է ստանա սկսած մանկապարտեզից, հենց փոքր հասակից իրեն զգա բնության մի մասնիկը, ծանոթանա մարդկանց ոչ գրագետ էկոլոգիական գործողությունների հետևանքներին: