Տեղեկատվական կենտրոն
Նորություններ
Անիմացիոն ֆիլմի ցուցադրությանը ներկա էր Արգենտինայի դեսպանը
10.11.2015
Այսօր Տավուշի մարզ էր այցելել Հայաստանի Հանրապետությունում Արգենտինայի Հանրապետության արտակարգ և լիազոր դեսպան Գոնզալո Ուրրիոլաբեիտիան: Դեսպանի հետ էր <<Ֆայդեք Արմենիա>> հիմնադրամի տնօրեն Նարինե Հայրապետյանը: Հյուրերն այս անգամ Տավուշի մարզում էին մշակութային ծրագրով: Գոնզալո Ուրրիոլաբեիտիան Տավուշի մարզպետի տեղակալ Կարեն Ադամյանի ուղեկցությամբ նախ այցելեց Հաղարծնի վանքային համալիր, այնուհետև եղավ 12-13-րդ դարերի կրոնական, կրթական և մշակութային նշանավոր կենտրոն Գոշավանքում: Դիլիջանի հոգևոր հովիվ Տեր Շավարշ քահանա Սիմոնյանը դեսպանին մանրամասն ծանոթացրեց այս հոյակերտ կառույցների պատմությանը, մեր ժողովրդի կյանքում ունեցած նրանց դերին ու նշանակությանը: Դեսպանն այնուհետև Իջևանի մշակույթի տանը ներկա գտնվեց Խուան Խոսե Կամպանելլայի <<Մետեգոլ>> անիմացիոն ֆիլմի ցուցադրությանը, որը կազմակերպվել էր դեսպանության, <<Ֆայդեք Արմենիա>> հիմնադրամի և Տավուշի մարզպետարանի կրթության, մշակույթի և սպորտի վարչության համագործակցությամբ: Նա ողջունեց իջևանցի դպրոցականներին ցուցադրության կապակցությամբ` մաղթելով նրանց բարի դիտում: Իջևանի հանրակրթական դպրոցների ավելի քան 250 դպրոցականներ մեծ հետաքրքրությամբ դիտեցին Արգենտինական ֆիլմերի IV փառատոնում մեծ հաջողություն ունեցած անիմացիան, որն անցկացվել է Երևանի <<Մոսկվա>> կինոթատրոնում: Մուլտֆիլմը ցուցադրվեց հայերեն և անգլերեն ենթագրերով: