Տեղեկատվական կենտրոն
Նորություններ
Զոհված ազատամարտիկների հիշատակին կանգնեցված խաչքարի բացում Ծաղկավանում
27.10.2015
Այսօր Տավուշի մարզի Ներքին Ծաղկավան գյուղում տեղի ունեցավ խաչքար-հուշարձանի բացում` նվիրված ազատամարտի մերօրյա հերոսների հիշատակին: Խաչքարը կանգնեցվել է գյուղի սկզբնամասում` Հայրենական մեծ պատերազմում զոհված ծաղկավանցիների հիշատակը հավերժացնող հուշարձանի հարևանությամբ: Կառուցման հովանավորն է ՀՀ պաշտպանության նախարարությունը, ճարտարապետը` Արմեն Ալեքսանյանը: Արարողությանը ներկա էին Տավուշի մարզպետի տեղակալ Լևոն Սարգսյանը, բազմաթիվ հյուրեր, երկրապահ կամավորականներ, գյուղի բնակչությունը: Միջոցառումն սկսվեց խաչքարի օծման կարգով, որը կատարվեց Տավուշի թեմի առաջնորդ Տ. Բագրատ եպիսկոպոս Գալստանյանի ձեռամբ: Հանդիսավոր արարողությանը ելույթներով հանդես եկան մարզպետի տեղակալ Լևոն Սարգսյանը, համայնքի ղեկավար Նաիրի Աթաբեկյանը, գրող, լրագրող ու հրապարակախոս Ռուբեն Սիմոնյանը: Այնուհետև Երկրապահ կամավորականների միության Տավուշի մարզային կառույցի ղեկավար Ռուդիկ Դավթյանը ԵԿՄ վարչության շնորհակալագրեր, մեդալներ ու պատվոգրեր հանձնեց զոհված ազատամարտիկների հարազատներին ու վետերան ազատամարտիկներին: Միջոցառումը եզրափակվեց գյուղի հանդիսությունների սրահում կազմակերպված մատաղի արարողությամբ: