Տեղեկատվական կենտրոն
Նորություններ
Իջևանի բժշկական կենտրոնում անցկացվեց դասընթաց պտղի սեռի խտրական ընտրության դեմ պայքարի թեմայով
26.10.2015
Այսօր Իջևանի բժշկական կենտրոնում անցկացվեց դասընթաց պտղի սեռի խտրական ընտրության դեմ պայքարի թեմայով: Մասնակցում էին մարզի առողջապահության, կրթության, սոցիալական ոլորտի, տարբեր շահառու խմբերի ներկայացուցիչներ: Միջոցառումը բացեց և <<Պտղի սեռի խտրական ընտրության դեմ պայքար>> ծրագրի թիմը ներկայացրեց <<Սեյվ դը չիլդրեն>> ծրագրի պատասխանատու Սոֆիկ Մինասյանը: Կարևորելով ծրագրի իրականացումը Հայաստանում` զեկուցողը նշեց, որ այն իրականացվում է չորս կազմակերպությունների կողմից: Դրանք են Մարդկային զարգացման միջազգային կենտրոնը, Արմավիրի զարգացման կենտրոնը, Մարտունու կանանց համայնքային խորհուրդը և <<Սեյվ դը չիլդրեն>> միջազգային կազմակերպությունը, որոնցից յուրաքանչյուրն իր առանձին դերակատարումն ունի ծրագրում: Ներկայացվեցին ծրագրի նպատակները, ակնկալվող արդյունքները և գործողությունները: Նշվեց, որ ծրագրի ընդհանուր նպատակն է նպաստել Հայաստանում երեխա ունենալը սեռով պայմանավորելու մշակույթի փոփոխությանը և հղիության ընթացքում կանխակալ ընտրության ցուցանիշների մակարդակի նվազեցմանը: Արդյունքում ակնկալվում է փոփոխել երեխա ունենալը սեռով պայմանավորելու խնդրի վերաբերյալ հայաստանցիների գիտելիքները, վերաբերմունքն ու ընկալումները, ինչպես նաև 10 տոկոսով կրճատել պտղի սեռով պայմանավորված հղիության արհեստական ընդհատումները: Ներկայացվեցին նաև ծրագրի գործողությունները: Այնուհետև ցուցադրվեց նորածինների սեռերի անհամամասնությունը ներկայացնող ֆիլմ, որին հաջորդեց պտղի սեռով պայմանավորված հղիության արհեստական ընդհատումների վերաբերյալ ակտիվ երկոսություն: