Տեղեկատվական կենտրոն
Նորություններ
Տուրիստական էքսպո` նվիրված Տուրիզմի միջազգային օրվան
01.10.2015
Նպատակ ունենալով խթանել ներքին տուրիզմի զարգացմանը, Զբոսաշրջության միջազգային օրվա կապակցությամբ, Հայաստանի երիտասարդական հիմնադրամը հանրապետության մարզերի և Արցախի մասնակցությամբ մայրաքաղաքում կազմակերպել էր տուրիստական էքսպո: Հյուսիսային պողոտայում հատկացված տարածքում, մյուս մարզերի ներկայացուցիչների հարևանությամբ, իր տաղավարով հանդես եկավ նաև ՀԵՀ Տավուշի մարզային կենտրոնը: Յուրաքանչյուր տաղավար ներկայացնում էր իր մարզին բնորոշ առանձնահատկությունները՝ ավանդական ուտեստները, ազգային երգ ու պարը, տարածաշրջանի պատմամշակութային վայրերը և այլն: Տավուշի երիտասարդները նույնպես պատշաճ էին ներկայացել էքսպոյին: Նրանք պատրաստել էին և ցուցադրեցին տարածաշրջանի առավել հայտնի ուտեստները, բերքն ու բարիքը և մշակութային առանձնահատկությունները: Հայկական տարազով գեղանի աղջիկները հենց տեղում իլիկ էին մանում, բուրդ էին գզում, ցորեն էին աղում և փոխինձ պատրաստում: Իսկ երևանցիներն ու զբոսաշրջիկները մեծ հետաքրքրությամբ հետևում էին աղջիկների աշխատանքին: Հատկապես մեծ հետաքրքրություն առաջացրեց Տավուշի տաղավարի կողմից ցուցադրված մարզի տուրիստական քարտեզը: Այս ամենն իրենց երգ ու պարով համեմում էին Իջևանի արվեստի դպրոցի սաները: Մարզի տաղավարի մոտ ամբողջ օրվա ընթացքում աշխուժություն էր, ու հետքրքրված մարդկանց ներկայությունն ապահովված էր: