Տեղեկատվական կենտրոն
Նորություններ
Նոր ուսումնական տարին Խաչարձան գյուղի դպրոցականները կդիմավորեն վերակառուցված ու բարեկարգված դպրոցում
14.08.2015
Նոր ուսումնական տարին Տավուշի մարզի Խաչարձան գյուղի դպրոցականները կդիմավորեն վերակառուցված ու բարեկարգված դպրոցում: Այսուհետ ուսումնառությունն այդպիսի դպրոցում իրականացնելու ուրախությունը նրանց պարգևել են արգենտինահայ բարերարներ Արտո և Հիլդա Կալչիյան ամուսինները և նրանց որդի Մաքսիմելիանը, ով շատ է հավանել տարածաշրջանի այս գողտրիկ անկյունը և ծնողների հետ որոշել աջակցել համայնքին: Օգոստոսի 14-ին բարերարների մասնակցությամբ տեղի ունեցավ վերակառուցված դպրոցի բացման հանդիսավոր արարողությունը: Միջոցառմանը ներկա էին Տավուշի մարզպետի տեղակալներ Լևոն Սարգսյանը, Կարեն Ադամյանը, մարզպետի օգնական Հարություն Ղուլիջանյանը, բազմաթիվ հյուրեր: Հանդիսությունն սկսվեց Հայաստանի Հանրապետության և Արգենտինայի Հանրապետության օրհներգերի կատարմամբ: Այնուհետև օրվա առթիվ դպրոցականներին, մանկավարժներին, գյուղի ամբողջ բնակչությանը շնորհավորեցին մարզպետի տեղակալ Լևոն Սարգսյանը, <<Հայաստան>> համահայկական հիմնադրամի գործադիր տնօրեն Արա Վարդանյանը, բարերար Արտո Կալչիյանը: Գյուղի երեխաներին նման հոյակերտ դպրոց նվիրելու համար երախտագիտության խոսք ասացին դպրոցի տնօրեն Լյովա Բուդաղյանը և համայնքի ղեկավար Գագիկ Շահնազարյանը: Դպրոցի նախկին շենքը գտնվում էր խիստ անմխիթար վիճակում: Այն հիմնվել էր 1989 թվականին, վերանորոգվել՝ 1997-ին, դասասենյակները տաքացվում էին փայտի վառարաններով: Իսկ այսօր ահա շնորհիվ բարերարների գյուղն ունի լավագույնս վերակառուցված, կենտրոնացված ջեռուցմամբ, ժամանակակից անհրաժեշտ գույքով հագեցված ու բարեկարգված մի հիանալի դպրոց, որտեղ, ինչպես խոստովանեցին և աշակերտները, և ուսուցիչները, թե սովորելը և թե դասավանդելը ուղղակի հաճույք կլինի, իսկ նոր դպրոցը նաև նոր հեռանկարներ կբացի համայնքի զարգացման համար: Ինչպես նշեց <<Հայաստան>> համահայկական հիմնադրամի գործադիր տնօրեն Արա Վարդանյանը, Կալչիյանների բարեգործությունը չի սահմանափակվում միայն դպրոցի վերակառուցմամբ: 2014 թվականին բարերար ամուսինների հովանավորությամբ համայնքում կառուցվել է նաև ժամանակակից բուժկետ, բազմաֆունկցիոնալ սրահ, դպրոցականներին նվիրաբերվել են գրենական պիտույքներ: Օրերս էլ Կալչիյանների կողմից դպրոցին նվիրաբերվել է միկրոավտոբուս: Առաջիկա շաբաթների ընթացքում էլ բարերար ամուսինները գյուղին կնվիրաբերեն մեղվափեթակներ ու անհրաժեշտ սարքավորում: Իսկ ծրագրում գյուղի խմելու ջրագծի և դպրոցի մարզադահլիճի կառուցումն է: Բարեգործական աշխատանքներին Կալչիյան ընտանիքի անդամները ներգրավել են նաև արգենտինահայ բարերարներ Թերզյան և Ավագյան ընտանիքներին, ովքեր ևս ներկա էին Խաչարձանի միջնակարգ դպրոցի բացմանը և պատրաստակամ են ներդրումներ անել գյուղի ջրամատակարարման ու սպորտի զարգացման ոլորտներում: Հյուրերին դպրոցում դիմավորեցին աղ ու հացով: Մուտքի կարմիր ժապավենը կտրեցին Մաքսիմելիան Կալչիյանը և դպրոցի տնօրեն Լյովա Բուդաղյանը: Ի նշան շնորհակալության դպրոցի կողմից Մաքսիմելիան Կալչիյանին նվիվեց Խաչարձանի պատկերով գեղանկար: Այնուհետև Տավուշի թեմի առաջնորդ Գերաշնորհ Տեր Բագրատ եպիսկոպոս Գալստանյանի ձեռամբ կատարվեց նորաբաց դպրոցի Տնօրհնեքի արարողություն: