Տավուշի մարզպետի աշխատակազմ

  Այսօր Տավուշի մարզի Այգեհովիտ համայնքի Կայան բնակավայրում տեղի ունեցավ Գեորգի Գագիկի Մնացականյանի հիշատակին կանգնեցված հուշարձանի բացման հանդիսավոր արարողությունը: Ներկա էին Տավուշի մարզպետի տեղակալներ Լևոն Սարգսյանը, Կարեն Ադամյանը, մարզպետարանի պատասխանատուներ, Գեորգի Մնացականյանի ծնողներն ու քույրերը, հարազատները, ծառայակիցներ ու ընկերներ, Այգեհովիտ համայնքի բնակիչներ:    Միջոցառումը բացեց Տավուշի մարզպետի տեղակալ Լևոն Սարգսյանը: Նա իր շնորհակալությունը հայտնեց Գեորգիի ծնողներին՝ հայրենիքին հերոս որդի պարգևելու համար, ով իր երիտասարդ կյանքը չխնայեց ընկերների կյանքը փրկելու համար:25-ամյա Գեորգի Մնացականյանը, ում ընկերները մտերմաբար Գևոր էին անվանում, զովեց 2013 թվականի հոկտեմբերի 16-ին՝ շփան գծից մի քանի հարյուր մետր հեռավորության վրա մարտական հատուկ առաջադրանք կատարելու ժամանակ: Հետաքրքիր լուծումներով մետաղական հուշարձանն էլ, որի հեղինակը ճարտարապետ Միսակ Մելքումյանն է, իսկ կառուցման հովանավորը Տավուշի մարզպետ Հովիկ Աբովյանը, կանգնեցվել է դեպքի վայրից ոչ շատ հեռու:
  -Օգոստոսի 13-ը մեզ համար ոչ միայն հիշատակի օր է, այլև ոգեկոչումի, և այսուհետ այս վայրը մեզ համար նաև սրբատեղի կլինի, որ ամեն վայրկյան մեզ կհիշեցնի հայրենիքի համար իրեց կյանքը զոհաբերած մեր նահատակներին, ում հերոսությունը հայրենասիրության կենդանի օրինակ է ապրողներիս համար, Գեորգի Մնացականյանի հերոսական ոգին կապրի բոլորիս սրտերում,-ասաց մարզպետի տեղակալը:
 <<Մարտական խաչ>> շքանշանի ասպետ Գեորգի Մնացականյանը ծնվել և մեծացել է Գավառում: Գերազանց գնահատականներով ավարտել է Գավառի թիվ 7 միջնակարգ դպրոցը, որն այսօր նրա անունն է կրում: Այնուհետև ընդունվել է Վազգեն Սարգսյանի անվան ռազմական ինստիտուտ, ընտրել սակրավորի վտանգավոր ու պատասխանատու մասնագիտությունը և, գերազանցությամբ ավարտելով այն, անցել ծառայության: Կարճ ժամանակում օրինակելի զինծառայողը հասել է կապիտանի աստիճանի և դարձել ինժեներա-սակրավորական վաշտի հրամանատար:
-Այսօր մեզ համար ոչ միայն հիշատակի օր է, այլև փառքի օր: Գևորն իր կյանքով օրինակ ծառայեց բոլորիս համար՝ ցույց տալով, թե ինչպես կարելի է ապրել, ծառայել ու նվիրվել հայրենիքին,- ասաց զորամասի՝ անձնակազմի հետ տարվող աշխատանքների գծով հրամանատարի տեղակալ, փոխգնդապետ Սահակյանը:
Նորակերտ խաչքար-հուշարձանն օրհնեց Իջևանի հոգևոր հովիվ տեր Սիմեոն քահանա Առաքելյանը: Հնչեց Տերունական աղոթք, և բազմաթիվ ու բազմերանգ ծաղիկներ խոնարհվեցին հայ քաջորդու հիշատակին կառուցված հուշակոթողին: Այնուհետև միջոցառումը շարունակվեց Կայանի դպրոցի դահլիճում, որտեղ իրենց ելույթով բոլորին հուզեցին ու հիացրին Կայանի դպրոցի ու Գավառի Գեորգի Մնացականյանի անվան դպրոցի շնորհալիները: Ելույթ ունեցավ նաև հերոսի հայրը՝ Գագիկ Մնացականյանը, ով մինուճար որդու կորստյան ցավը սրտում, հուզմունքով նշեց, որ հպարտ է, որ Գևորի նման որդի է ունեցել: Նա նաև իր շնորհակալությունը հայտնեց Տավուշի մարզպետ Հովիկ Աբովյանին՝ հուշարձանի կառուցումը հովանավորելու համար: Միջոցառման ավարտին երկրապահ կամավորականների միության պատվոգրերով պարգևատրվեցին Տավուշի մարզպետ Հովիկ Աբովյանը, ճարտարապետ Միսակ Մելքումյանը, զորամասի հրամանատար, գնդապետ Վահե Հովսեփյանը, Կայանի դպրոցի տնօրեն Լենա Վարդանյանը: