Տեղեկատվական կենտրոն
Նորություններ
Համատեղ ուժերով մաքրեցին ու բարեկարգեցին Մորո Ձորի վանքի շրջակայքը
03.07.2015
<<ՀՀ Տավուշի մարզի տուրիզմի զարգացման գործակալություն>> հասարակական կազմակերպության և Երևանի պետական համալսարանի Իջևանի մասնաճյուղի տուրիզմի ֆակուլտետի <<Սերվիս>> մասնագիտության ուսանողների միջև ստեղծված համագործակցությունը գնալով խորանում է: Օրերս հասարակական կազմակերպության անդամներն ու համալսարանի մասնաճյուղի 1-ին և 2-րդ կուրսի ուսանողները հանդես եկան համատեղ հետաքրքիր նախաձեռնությամբ՝ գործնական սեմինար պարապմունք անցկացնել Լուսահովիտ համայնքում: Իսկ օրակարգում համայնքի տարածքում գտնվող Մորո Ձորի վանքի ու նրա շրջակայքի մաքրման ու բարեկարգման հարցն էր: Նախաձեռնության հեղինակներին իր անձնական օրինակով ոգևորում էր համալսարանի դասախոս Պավել Ասիլբեկյանը: Ժրաջան մեղվի նման երիտասարդ տղաներն ու աղջիկներն իրենց ամբողջ օրը նվիրեցին հանրօգուտ աշխատանքին՝ գերագույն բավականություն ստանալով իրենց իսկ կատարած գործից: Իսկ աշխատավորների սննդի հարցը հոգացել էր համայնքի ղեկավար Արայիկ Սարհատյանը: