Տավուշի մարզպետի աշխատակազմ

Տավուշի մարզպետ Հովիկ Աբովյանի անմիջական նախաձեռնությամբ հունիսի 27-ին բանակ-հասարակություն կապի ամրապնդմանն ուղղված հերթական հանդիպումն էր կազմակերպվել Տավուշի մարզպետարանում: Այս անգամ իրենց ծնողների ու հարազատների հետ հանդիպելու հնարավորություն էին ստացել ծառայության մեջ իրենց լավագույնս դրսևորած տավուշցի 23 ժամկետային զինծառայողներ, ովքեր ծառայությունն իրականացնում են 1-ին բանակային կորպուսում: Հանդիպմանը ներկա էր 3-րդ բանակային կորպուսի հրամանատար, գեներալ-մայոր Օնիկ Գասպարյանը: Ողջույնի իր խոսքում մարզպետ Հովիկ Աբովյանը երախտիքի խոսք ասաց զինծառայողների ծնողներին՝ քաջ ու հայրենասեր որդիներ դաստիարակելու համար, ովքեր ծառայության մեջ բարձր են պահում սահմանապահ Տավուշի մարզի ու տավուշեցու պատիվը և վստահեցրեց, որ նման հանդիպումները կլինեն շարունակական: Իր ելույթում 1-ին բանակային կորպուսի հրամանատար, գնդապետ Տիգրան Փարվանյանը շնորհակալություն հայտնեց Տավուշի մարզպետ Հովիկ Աբովյանին այս համատեղ միջոցառումը նախաձեռնելու համար՝ ընդգծելով նման հանդիպումների կարևորությունը բանակ-հասարակություն կապի էլ ավելի ամրապնդման ու խորացման գործում: Նշվեց, որ 1-ին բանակայինը բանակաշինության լավագույն ավանդույթները կրող զորամիավորումներից է, և որ այնտեղ ստեղծված են բոլոր պայմանները պատշաճ ծառայություն իրականացնելու համար: Նա նաև երախտիքի խոսք հղեց զինծառայողների ծնողներին՝ բանակին նման դաստիարակված ու անվեհեր զավակներ տալու համար: Այնուհետև գնդապետը բանակ-հասարակություն կապի ամրապնդման գործում ունեցած ավանդի համար անվանական ժամացույցով պարգևատրեց Տավուշի մարզպետ Հովիկ Աբովյանին: Մարզպետն էլ իր հերթին հուշանվեր-ժամացույց նվիրեց հրամանատարին: Իսկ որդիական պարտքը հայրենիքի հանդեպ նվիրումով կատարող ժամկետային զինծառայողների ծնողներին Տիգրան Փարվանյանը հանձնեց պատվոգրեր ու շնորհակալագրեր, նրանց որդիներն էլ հրամանատարի կողմից խրախուսվեցին կարճաժամկետ արձակուրդով: Շնորհակալություն հայտնեցին և իրենց զավակներին տեսակցելու հնարավորությունը բարձր գնահատեցին զինվորների ծնողները: Միջոցառման ընթացքում ցուցադրվեց 1-ին բանակային կորպուսի ստեղծման, նրա ներկայի ու այնտեղ ծառայող զինվորի առօրյայի մասին պատմող ֆիլմ: Հանդիսությունը եզրափակվեց Իջևանի միջնակարգ երաժշտական դպրոցի սաների և ժողգործիքների համույթի գեղեցիկ կատարումներով: