Տեղեկատվական կենտրոն
Նորություններ
Ընթերցանության օլիմպիադայից՝ հատուկ մրցանակով
21.05.2015
Ավարտվեց ՀՀ կրթության և գիտության նախարարության, ՀՀ մշակույթի նախարարության և <<Անտարես>> հրատարակչության նախաձեռնությամբ հանրակրթական դպրոցների 6-րդ դասարանցիների համար անցկացվող <<Ընթերցման օլիմպիադա 2015>>-ի հանրապետական փուլը: Հաղթահարելով օլիմպիադայի դպրոցական և մարզային փուլերը՝ Իջևանի թիվ 1 հիմնական դպրոցի շնորհալի սան Միքայել Մխիթարյանը, ում դասավանդում է հայոց լեզվի և գրականության փորձառու ուսուցչուհի Լաուրա Բադալյանը, հաջողությամբ մասնակցեց նաև հանրապետական փուլին և օլիմպիադայից վերադարձավ հատուկ մրցանակով ու բազմաթիվ նվերներով:
<<Ընթերցման օլիմպիադայի>> մասնակիցների պարգևատրման հանդիսավոր արարողությունը տեղի ունեցավ Հայաստանի ազգային գրադարանի մեծ դահլիճում: Հանդիսավոր միջոցառմանը ներկա էին ու մրցանակները հանձնեցին ՀՀ կրթության և գիտության նախարար Արմեն Աշոտյանը և ՀՀ մշակույթի նախարար Հասմիկ Պողոսյանը: Որպես հատուկ պարգև Միքայելին հանձնվեց պլանշետ, իսկ նվերների թվում էին բազմաթիվ գրքեր ու գրիչներ, նոթատետրեր, կոնֆետների տեսականի, ինչպես նաև եռօրյա ուղեգիր Արցախ և <<Կիլիկիա>> գարեջրի գործարան այցելելու հնարավորություն, որտեղ նույնպես ընթերցանության փոքրիկ վարպետին սպասում են նվերներ: