Տավուշի մարզպետի աշխատակազմ

Եղեռնի 100-րդ տարելիցին նվիրված միջոցառումների շրջանակում, ապրիլի 18-ին Տավուշի մարզի Ոսկեվան համայնքում բացվեց ցեղասպանության զոհերի հիշատակը հավերժացնող հուշաքար: Բացման առիթով Ոսկեվանում բազմամարդ միջոցառում էր կազմակերպվել, որին բացի ոսկեվանցիներից մասնակցում էին բազմաթիվ հյուրեր մայրաքաղաքից, այլ մարզերից ու Տավուշի մարզի մյուս համայնքներից: Ներկա էին Տավուշի մարզպետի տեղակալներ Լևոն Սարգսյանը և Կարեն Ադամյանը: Հուշաքարը տեղադրվել է դեռևս 1990 թվականին բացված Անդրանիկ զորավարի արձանի կողքին: Հեղինակը հենց ոսկեվանցի քանդակագործ Արթուր Մելքոնյանն է, ով քարին համադրել է Պատմական Հայաստանի տարածքը,հավերժության խորհրդանիշ նուռը, ու նաև սրի նմանվող խաչը: Այս նախաձեռնության հեղինակը Ոսկեվանից սերված Լորիս Սաֆարյանն է:
Հուշաքարի բացման արարողությանը ելույթ ունեցավ Տավուշի մարզպետի տեղակալ Լևոն Սարգսյանը: Նա իր խոսքում կարևորեց նման արարողության անցկացումը Եղեռնի 100-րդ տարելիցին նվիրված մարզում անցկացվող միջոցառումների շարքում և Տավուշի մարզպետ Հովիկ Աբովյանի ու անձամբ իր անունից շնորհակալություն հայտնեց ոսկեվանցիներին այդ նախաձեռնության համար: Միջոցառմանը Տեր Սմբատ քահանան արարողակարգ կատարեց, իսկ Ոսկեվանի դպրոցի սաները հանդես եկան ելույթներով՝ դրանցում ոգեկոչելով Եղեռնի զոհերի հիշատակը:

Լուսանկարները՝ tesankyun.am-ի