Տեղեկատվական կենտրոն
Նորություններ
Քննարկում նախադպրոցական հաստատությունների սանիտարական նորմերի վերաբերյալ
12.02.2015
Նախօրեին Տավուշի մարզպետարանում հավաքվել էին Իջևանի տարածաշրջանի համայնքների ղեկավարներ, մանկապարտեզների տնօրեններ, պաշտոնատար այլ անձիք, որոնք պատասխանատու են մանկապարտեզներում սանիտարական նորմերի և այլ կանոնների պահպանման հարցերում: Տավուշի մարզպետարանի աշխատակազմի առողջապահության և սոցիալական ապահովության վարչության պետ Կարինե Դովլաթբեկյանը տեղեկացրեց, որ հիվանդությունների վերահսկման և կանխարգելման ազգային կենտրոնի <<Տավուշ>> մասնաճյուղի կողմից մարզի բոլոր մանկապարտեզներում կատարվել են ուսումնասիրություններ: Խորհրդակցության ընթացքում վեր հանվեցին արձանագրված թերություններն ու բացթողումները, ինչպես նաև քննարկվեցին դրանց վերացման, խնդիրների լուծման ճանապարհները: Համայնքների ղեկավարները և մանկապարտեզների տնօրենները պատրաստակամություն հայտնեցին վերացնել այն թերությունները, որոնց համար անհրաժեշտ ֆինանսական ծախսերը հնարավոր է հոգալ տեղական բյուջեի սահմաններում : Սակայն կան խնդիրներ, որոնք հատկապես սահմանամերձ Տավուշի մարզի համար համայնքի բյուջեի միջոցներով հնարավոր չէ լուծել: Դրանք կապված են շենքային պայմանների, մշտական հոսող տաք ջրի ապահովման, գույքի ձեռք բերման և այլ խնդիրների լուծման հետ: Առաջարկվեց կազմել խնդիրների և թերությունների վերացման ժամանակացույց՝ նշելով լուծման ճանապարհները, ժամանակը և հնարավոր միջոցները: Որոշվեց առաջիկայում մարզի բժշկական հաստատությունների միջոցով անցկացնել ուսուցողական դասընթացներ նախադպրոցական հաստատությունների սպասարկող անձնակազմի հետ: Մասնագետները պատրաստակամություն հայտնեցին նաև լինել տեղերում և օգնել մեթոդական ցուցումներով: Նմանատիպ քննարկումներ լինելու են նաև մարզի մյուս տարածաշրջաններում: