Տեղեկատվական կենտրոն
Նորություններ
Տավուշի մարզպետարանում տեղի ունեցավ ԵԱՀԿ հերթական բրիֆինգը
16.10.2014
Այսօր Տավուշի մարզպետարանում կայացավ ԵԱՀԿ հերթական բրիֆինգը, որը վարում էր ՀՀ Տավուշի մարզպետ Հովիկ Աբովյանը: Բրիֆինգին մասնակցում էին ԵԱՀԿ գործող նախագահի անձնական ներկայացուցիչ Անջեյ Կասպրշիկը, ԵԱՀԿ Մինսկի խմբի համանախագահներ Իգոր Պոպովը, Պիեռ Անդրյուն և համանախագահ Ջեյմս Ուորլիքի օգնականը, ովքեր ժամանել էին Ադրբեջանից՝ հատելով հայ-ադրբեջանական շփման գիծը: Ներկա էին նաև Տավուշի մարզպետի տեղակալ Լևոն Սարգսյանը, ՀՀ արտաքին գործերի և պաշտպանության նախարարության ներկայացուցիչներ: Բրիֆինգի ընթացքում ԵԱՀԿ պաշտոնյաներին ներկայացվեցին հայ-ադրբեջանական շփման գծում տիրող իրավիճակը, ադրբեջանական զինուժի կողմից հրադադարի ռեժիմի խախտման դեպքերը: Մասնավորապես, մարզպետ Հովիկ Աբովյանը տեղեկացրեց հուլիս - օգոստոս ժամանակահատվածում մարզի սահմանին հարող տարածքում տիրող իրավիճակը, և թշնամու կրակոցների ակտիվացման հետևանքով խաղաղ բնակչության կրած վնասները: Նշվեց, որ բերքահավաքի եռուն շրջանում սահմանամերձ գյուղերի բնակիչները չկարողացան գյուղատնտեսական աշխատանքներ իրականացնել, իսկ ավելի քան 700 բնակարան սահմանամերձ համայնքներում գնդակոծության հետևանքով վնասվեցին: Մարզպետը տեղեկացրեց, որ վերջին օրերին նույնպես կրակոցներ են հնչել Չինարիի, Մովսեսի, Այգեպարի և Բարեկամավանի ուղղությամբ, բարեբախտաբար մարդկային զոհեր չեն եղել: Մարզպետ Հովիկ Աբովյանը միաժամանակ շնորհակալություն հայտնեց համանախագահներին՝ խնդրի կարգավորման հարցում կարևորելով ԵԱՀԿ Մինսկի խմբի դերակատարությունը և բոլորին մաղթեց արդյունավետ աշխատանք հայ-ադրբեջանական շփման գծում լարվածության թուլացման ուղղությամբ:
Վերջում մարզպետ Հովիկ Աբովյանը և ԵԱՀԿ Մինսկի խմբի համանախագահները պատասխանեցին լրագրողների հարցերին: