Տեղեկատվական կենտրոն
Նորություններ
Տավուշի մարզում մեկնարկեց ամենամյա մարզական փառատոնը
12.09.2014
ՀՀ սպորտի և երիտասարդության հարցերի նախարարության նախաձեռնությամբ և Տավուշի մարզպետարանի ու Իջևանի քաղաքապետարանի աջակցությամբ այսօր Իջևան քաղաքում մեկնարկեց ամենամյա մարզական փառատոնը: Ամենամյա մարզական փառատոնն անցկացվում է հանրապետության մարզերում և Լեռնային Ղարաբաղի Հանրապետությունում, որի հիմնական նպատակն է ֆիզկուլտուրայի և սպորտի մասսայականացումը համայնքներում և այդ բնագավառում տեղական ինքնակառավարման մարմինների դերի բարձրացումը, իսկ բնակչության շրջանում առողջ ապրելակերպի արմատավորումը, երիտասարդությանը մարզական խմբակներում ընդգրկելը:
Փառատոնն սկսվեց Իջևանի մարզադպրոցի բակում՝ հանդիսավոր արարողությամբ: Պարային համարներով ելույթ ունեցավ Իջևանի արվեստի դպրոցի <<Փյունիկ>> պարային համույթը: Փառատոնի մասնակիցներին շնորհավորեց և ողջունեց ՀՀ Տավուշի մարզպետի տեղակալ Կարեն Ադամյանը: Արժևորելով նմանատիպ միջոցառումների անցկացումը մարզերում, Կարեն Ադամյանը նշեց, որ յուրաքանչյուր հարցում մարզպետարանը պատրաստ է աջակցել երիտասարդ մարզիկներին մարզումներն ու պարապմունքները պատշաճ կերպով անցկացնելու համար: Նա մարզական փառատոնի մասնակիցներին մաղթեց նորանոր հաջողություններ ֆիզկուլտուրայի և սպորտի բնագավառում:
Միջոցառման ընթացքում մատաղ սերնդի կրթության և դաստիարակության գործում մեծագույն վաստակի համար ՀՀ Տավուշի մարզպետ Հովիկ Աբովյանի կողմից շնորհակալական պատվոգրեր ստացան ֆիզկուլտուրայի վաստակաշատ ուսուցիչներ Վովա Փաշինյանը և Համլետ Այդինյանը:
Փառատոնի ծրագրում մասնակիցները կմրցեն մինի ֆուտբոլ (թիմի կազմը՝ 8 հոգի), մասսայական վազքարշավ (100 մետր), շախմատ, բազկամարտ, կշռաքարի (16 կգ) բարձրացում և նարդի (երկար) մարզաձևերում: Մրցումները կանցկացվեն աթլետիկայի գործող կանոնների համաձայն: Փառատոնի 1-ին, 2-րդ և 3-րդ տեղերը գրաված մասնակիցները կպարգևատրվեն ՀՀ սպորտի և երիտասարդության հարցերի նախարարության հավաստագրերով: Առաջին պատվավոր տեղը գրաված մասնակիցները կստանան նաև մարզահագուստներ: